40+2卸货结束（1）
27487怀孕妈妈
Natalli好长好长的生产记...应该唔会再有机会写了，唔会有再有第二次了...
卸货日子：2018-12-28
预产期（12.26.）前一个礼拜产检完就预约咗下次产检时间，我特登选择咗预产期当日~
来到预产期当日啊B咩征象都无，产检科个医生叫我即时去做个B超睇睇，当距睇晒所有报告后话我知，胎位正，啊B个头也唔算大，但腹围偏大，可以等作动尝试顺产…我话既然已经到咗预产期，甘我直接选择剖腹产了，但个医生死都叫我尝试顺产，而且预产期唔系一定准的【道理我更知啦~问题系我唔想日日心挂挂甘等啊嘛~】
后尾同老公商量，虽然胎位正，头唔大可以尝试顺产，但腹围偏大我真系担心到时顺产出D唔出D，出唔到的要钳或者转剖腹产…对我对B来讲都系双重伤害，既然知道哩个概率系偏高的，甘我就宁愿将个风险放在自己身上都好过放在啊B身上，再讲也唔想双重痛…后来联系咗相熟的医生…第二日个教授除咗睇B超外，仲帮我摸咗下胎同我分析埋顺转剖的几率好大下，所以我话要直接㓥的时候距即刻就开入院单比我，当日入院第二日早上第一台手术【好彩当时我已经提前执好咗待产包，一直放在台车度】
入院第一日，常规检查一大堆野，住院部的医生接连来咗几次问我点解要㓥，睇数据未超8斤重，达唔到巨大儿未至于要直接㓥，一直就劝我尝试顺产…因为甘再被安排去做多次B超，出结果后D医生依然系建议我晚上打催生针尝试顺产【我觉得系因为我已经办好晒入院手续，唔可能比我住到自然作动】，我真系觉得个医生当我系傻的…除非当晚作动，否则我有乜可能将风险放在啊B身上同增加自己要痛多次的几率呢?!由于我知道主刀医生唔系哩D住院部医生，所以我系非常坚定要直接㓥的~
负责我住院的研究生医生【应该系实习医生，甚至乎我觉得可能连牌都未有的】话如果自己选择㓥要自己承担风险【借问有边D风险唔系自己承担的呢？】后尾我先知，原来㓥都有分两种，一种系所谓达到㓥的界定点【例如：巨大儿要达到8斤重】另一种就系达唔到临界点但自己选择㓥，签字的果份文件会有所唔同【唔同的点就系医生的判断语】后尾另外一个住院部的医生【睇得出系位高权重D既】睇过我D报告后话，B超的数据并唔系百分百准确的，系有正负值的，所以我哩种情况应该写待排【意思系几率大，需待排查，打个问号~哩个先系判断语的重点】
晚上8点后唔可以吃野，10点后唔可以饮水，为听日一早的手术做准备…医院的政策，哩晚系唔可以有家属陪同的，得我自己一个…虽然平时我都系个好硬撑的人，但此时此刻个人真系会怯，毕竟第一次上手术台…
入院第二日，一大早就比护士叫醒插尿管，第一次感觉唔好受，再加上心理状况唔多平稳，后尾老公同我娘到咗后就平复翻D…直到我训在转移床上由病房到手术室门口一路望住天花的灯，好似一切都变得朦朦胧胧…虽然老公同我娘一直在身边，但我已经开始泪腺发达…可能系惊可能系怯，哩个moment我先真正感受到我娘一直讲的在鬼门关走一转…
入到手术室…手部吊上针水，量着血压，脊椎打麻醉开初以为会好痛好痛，会痛到叫出声，但原来哩种痛系在我可接受范围内的~一段时间后我开始感觉到右脚麻痹，跟住到左脚…主刀医生入来后捏咗下我的肚皮问痛唔痛，原来系通过甘的方式判断D麻醉系未已经达到可以开刀的效果~当我静系感觉到下半身麻痹的时候，主刀医生就一句开始就落刀戒开我的肚皮，一刀长长的，我唔记得戒咗几多刀但绝对唔止3刀…戒开后感觉到医生在度推我个肚，有少少感觉但唔系痛感，跟住医生一边推一边讲啊B比较大甘样推都未挪得到出来，突然间我就有痛感直接讲咗出声…主刀医生听到我话有痛感后就叫麻醉医生加多少少麻醉量，距会在2分钟内挪啊B出来…然后麻醉医生就比我吸麻醉的呼吸机，要我持续深呼吸…可能系麻醉的作用加上转移咗专注力，深呼吸两三次已经无痛感，跟住就听到医生话挪到啊B了，报咗啊B的出世时间，然后就听到啊B的喊声了…
感觉自己用咗好大力气问医生系仔定囡【其实之前已经隐约知道系囡，但出世仲系要自己确认】，医生抱啊B过来比我睇，第一眼比我睇patpat…第二眼我先望到个样，好记得自己喊住甘讲第一句话“点解D头发甘栾噶【我系直发，老公系栾栾地，老公一直都希望如果系囡，D头发一定要似我】”医生听到笑咗出来话栾发唔好咩~医生一边缝针一边讲啊B个头都几大下，此时此刻我仲同医生讲“你话我选择直接㓥系未明智之举”医生就笑笑下【哩个主刀医生就系相熟的果个】
当我被推出手术室后第一眼就见到老公同我娘冲咗埋来，此时此刻真系飚晒眼泪…个人真系好攰，直到我被推翻入病房过床后，我应该就直接昏睡状态，但我隐约知道老公一直在我身边…虽然系昏睡的状态，但仲系感觉到护士隔一段时间来睇伤口，仲要用好重的野压住我伤口，有痛感但忍得住，E+回想起来应该系当初手术的时候加大咗麻醉的量加上麻醉泵发挥的作用…
醒来后我先知自己有几攰同有几甘痛，完全无办法转身…由于医院唔系母婴分离，老公就一直在身边照顾我之余又要照顾啊B，个样已经残到无得再残了…
在医院哩几日一直都系老公负责早上，我娘负责晚上，睇到距地甘攰其实我个心系好唔舒服的，我相信自己系由哩个时候开始有产后忧郁的征兆…不间断甘觉得自己系一个废人，只可以训在张床度乜都做唔到，连我自己个B都要其他人来照顾…情绪好低落，无征兆甘就会乱林野，跟住就会流泪…当时我清楚知道自己的情绪出现咗问题，但我无办法自控…在医院其实系好压抑的，所以我在手术后第二日拆咗个麻醉泵、放气、去厕所，第三日在楼层自己行，第四日出院…在医院甘多日我一直都唔敢也无抱过啊B，因为我怕自己照顾唔到距…所以一直都系我老公同我娘照顾啊B，我老公真系由0开始学，比我更识得点去照顾啊B，真系会觉得自己好无用…
待续...
40+2卸货结束（2）
http://www.gzmama.com/thread-5336598-1-1.html
2019/01/23
Natalli楼
annarem
迟来姗姗
conniesky
当归靓丽
