冯宝宝出世啦~

      预产期系7月11日，每日都喺期盼中度过。7月8号晚上，BB郁得特别厉害，比平时所有时候都要郁得厉害得多，而且成晚都无听过，我同阿妈讲，阿妈话，咁就啱啦，我以前生你过时嘅前一晚又系咁嘅，你应该好快啦~
   果然7月9号早上8点去厕所，突然就见红啦，谂住见红之后有排都未生得，就恣油淡定咁执下嘢，准备等到有宫缩先去冲凉。点知到咗8点半，宫缩就来啦，而且都几剧烈，咁就唯有拿拿林去冲个凉洗个头，搞掂咗之后，未够9点，宫缩就开始10分钟一次，原来准备食埋家婆煮嘅炒饭先去医院，但系宫缩越来越强烈，已经食唔切啦，唯有带住D饭，急急脚咁去医院。

   去到医院，话俾医生听，我8点见红，9点就10分钟痛一次，每次持续30秒以上，过个住院医师仲非常唔相信，于是就去早阴检，点知佢吓咗一跳，“哇，开咗一指啦”。唔系你以为我日日行咁多楼梯，各行半个钟头上落班系为咗乜，就系为咗可以生快D。果日有床位，但系要等人出院先可以去，于是我就坐喺护士站外边等。

   到咗11点半，宫缩越来越强烈，抓住老公只手猛捏，但系因为系周六早上，人少而且忙碌，无人理我，我老豆睇唔过眼，大声同护士讲：“佢好痛啊，做乜咁耐咖！”于是有个护士问我，依家几耐痛一次，我话2、3分钟一次，于是又一次肛检（肛检比阴检痛苦得多），护士吓咗一跳，跑咗出去叫人，好快，一张床推咗埋来，佢叫我训喺张床度，然后同我老公讲：“快，已经开咗5指啦，要马上去产房生啦”。于是我就系咁俾人急急脚咁推咗去产房。

   宫缩痛唔紧要，痛苦嘅系，未开10指之前，唔可以用力，只有大力咁深呼吸，而且要保持用鼻吸气，用口呼气，咁先可以有充分嘅氧气俾BB。就系咁痛到1点半，终于都开全啦，可以用力啦，宫缩痛嘅时候可以用力，其实唔系咁痛苦嘅事，医生仲话我用力用得好好（我尿同便便都出埋来，都顾唔到咁多啦），好快就见到胎头啦，于是佢哋叫咗医生落来（一直都只有助产士喺产房）。2点15分嘅时候，医生话，我估计2点18分就可以出来啦！我听到之后非常兴奋开心，于是用尽所有嘅力气，好似屙便便咁向下用力，然后感觉到有嘢出紧来，而且越出越快，突然，全身松晒，而且一阵喊声传来，BB终于出来啦，哈哈，啱好系2点18分。

   第一眼见到BB，真系最熟悉嘅陌生人啊~~佢瞪到只眼好大，而且睩来睩去，好似要睇清楚呢个世界咁。讲真，第一眼见到BB，并无果D其他人讲嘅好感动，好想喊嘅感觉，我嘅第一句话竟然係：咁丑样嘅~~

   真係没有最痛，只有更痛，宫缩痛远远比唔上缝侧切嘅痛，一针针，眼泪水都要出来啦。突然间，一直唔出声嘅护士竟然同我讲嘢：你边度工作咖。我啱啱想答佢，突然间一针入心入肺嘅痛，我大叫好痛啊，佢就话“无计，呢度係血管同神经最丰富嘅地方，係好痛咖啦”。原来佢同我讲嘢係想转移我嘅注意力~

   住院嘅日子都好难捱，不过每时每刻都见到BB，令到我越来越钟意佢，越来越唔舍得唔望佢~~我老公直头抱住佢唔肯松手~~

   BB我爱你，你要健康成长啊！