我的“生产”记

做妈妈唔容易呢个道理早就知，但自己亲身经历过先知道做妈妈唔单止唔容易，而且非常、更加、超级唔容易！ 6月22日原本系萱萱嘅预产期，原以为会迟一**生，点知拖到成个星期都无动静。虽然平时会有D宫缩，但呢宫缩根本就系小儿科--不痛不痒！
  6月28日去咗医院重新做BC同胎监，好彩一切都正常。
  6月29日正式入院。我两公婆一大早（大概9点到10点左右）就去咗一五七医院嘅住院部，登记好所有资料之后就去待产室做胎监，一做就做足2个几钟。系待产室里面，有两个大肚婆都系度做胎监，瞓系我右边果位准妈妈叫到要生要死，我当时谂：有无咁痛啊！！做胎监做到一半时我嘅主治医生李医生同我做详细检查，包括臀围、宫颈成熟度等等。可惜我嘅宫颈成熟度只有3分左右，唔可以直接顺产。李医生同我讲，BB已经41周唔可以再拖落去，建议我先用药促进宫颈成熟，俾自己一个顺产嘅机会，如果用咗药都无效到时就要剖腹产。难得有个顺产嘅机会，所以我决定用药。D药都唔便架·！成600蚊左右一粒，系放系宫口到。去厕所都要好小心，一个唔觉意，就会掉落厕所。
可惜当日早上嘅胎监唔理想，BB嘅胎心去到160-170，实在太高了，唔知BB系咪知道要用药催生，所以有D惊呢？无办法，只能下午先可以用药。中午食完饭，就系医院冲凉、洗头。然后瞓午觉。。。。
6月29日14：30准时去待产室再做胎监，做咗一个钟头，胎监好好，平均143左右。呢个时候刚有人在系度生BB（只有一个助产士帮手），产房就系待产室后面，而且可以清晰见到生仔成个过程。。当时睇人地生仔，好似好轻松咁，当时就谂：其实生仔都唔系好难嗻~
15：30开始用药，医生将的药塞入子宫，真系好鬼痛。。医生仲话我呢D痛都忍唔住，到咗真系要生点算，我话到时先算啦。。。
15：50开始有反应了，个肚，应该话系子宫开始痛，有D似痛经咁。每隔半个钟到40分钟左右痛一次，每次痛都唔会超过2分钟。自己可以忍得住。。
   17：30医生叫我去食饭先，2个钟之后再来待产室。返返去病房，食饭食到一半，个肚越来越痛，平均1-2分钟痛一次，痛感越来越强。但呢的痛感就唔似痛经咁啦。。无办法形容系点痛法，只能话好似个肚抽筋咁。。大概系咁啦。。
   18：45入返去待产室，我同医生讲，我个肚好痛，好难受。医生帮我检查宫口，先开咗一指。痛咗两个钟先开咗一指。。晕咯！几时先开到十指啊！！！我开始痛到顶唔顺了。。
   20：15左右医生再次检查宫口，呢个时候差唔多开到三指。我果阵时已经痛到傻傻地，D汗好似唔使钱咁，一直不停咁流，冲咗凉都系白冲，我随身带住果条毛巾早就被我的汗淋到湿晒。总之就好难受。其他的大肚婆一个接住一个咁生BB，我呢只能系度等等等~望住个钟，一分一秒咁样过去。。。我老公每隔几分钟就打一次电话，我每次都只会同一句说话：老公，好痛啊，可唔可以唔生啊~真系好Q痛啊！！！（要经历过嘅女人先知道其中嘅滋味）虽然有老公嘅安慰但都系止唔到痛。。过咗一阵，我问咗下医生打无痛系点架。。原来所谓嘅无痛针系要打系脊椎度，谂下谂下都系算了，万一出咗意外就弊了。。。都系忍一忍啦。。
   20：45，医生帮我穿羊水，D羊水一D都唔似D普通水咁，D羊水系带粘性，有血丝，有小小浑浊。不过都算几清。。。穿咗羊水之后一切都无变到，都系继续等“开宫”
   21：15左右已经开到5-6指啦。。已经算快脆了。呢个时候平均3-4分钟左右痛一次，唔痛嘅时候真系好爽，果阵感觉就好似大解放咁，好舒服，超级爽。但好景不长，因为唔痛之后就系一场大痛，一痛就两三分钟，真系越来越罗命，而且仲有D急屎嘅感觉。我成个人开始发颠了，刚开始仲可以用深呼吸法压住D痛，但后尾就完全无效。我开始咬毛巾，撕被同枕头，有几大力就用几大力，对脚不停踢床。后尾被医生发现，警告我唔好乱用力，一来BB嘅胎心会下降，二子宫口会水肿，子宫口水肿就唔可以顺产生BB。。所以腹部以下嘅肢体只能定系度，对手不停扯被扯枕头。每一次痛，我都会睇一睇胎监器，就系惊我郁果阵时BB嘅胎心会下降，时刻提醒自己唔好乱咁郁。。。
   21：50左右已经开到7-8指了，痛感越来越犀利，我成个人都已经神志不清了，望人都已经望唔清，混混沌沌咁。。D汗不停咁流，实在顶唔顺了，我只能喊，但系无论点喊，都系唔会流一滴眼泪，可能D汗流得太多，所以已经无咩水份系对眼度。D医生惊我喊过龙，叫我唔好喊，会对BB唔好。。而且对自己都唔好。
   22：15左右，医生用手放入子宫口度，系促进子宫快速开指。佢系整流器嘅过程中，发现BB嘅头仔卡住系宫口度出唔到来，医生用指叉开宫口嘅肌肉，但好可惜太紧了，整唔开。李医生同佢的同事讲：这一次是我最要命的一次，我的手指都要撑断了，但宫颈口还是撑不开。佢仲叫其他医生帮手，但都系整唔出BB个头仔。。
   22：35左右，医生要我自己落床行去产房，我当时都唔知自己系点样行过去，点样爬上张产床。瞓上张产床，开始我嘅生仔过程了（上产床前好彩饮咗成支红牛，否则就无力生啰）。。
   每一次想屎时，就用力将BB挤出来，但系无论我点用力BB就系出唔到来，李医生仲叫咗三位助产士同另外两位医生一齐帮手，我生仔都算大阵像啰！咁多人帮手，一个系我肚度按，两个轮流撑开宫颈口，另外果D就等命帮手。一到宫缩时，医生、助产士就会叫我“用力、憋气、不要出声”，但力气有限，每次谷气都系谷一阵间就叫出来，一叫出来就无晒D力了。。又要再等下一次宫缩。。。
23：00我望住个钟，系度谂唔会生到30号都未生出来啊嘛？！呢个时候我听到D医生讲，叫手术室准备一下，如果再生唔出就要剖腹了。死啦，系我个肚开个刀，我唔制啊！我唔想留疤啊，咁Q核突。。我心里边同BB讲，BB啊，妈妈唔想开刀啊，你乖乖地出来啦，我地一齐努力啦。。妈妈真系唔想开刀啊，你就听妈妈一次啦。。。
23：15，医生终于将我嘅宫口撑开咗了，BB嘅头仔终于都顺利出来啦，后尾医生系果个“位置”剪咗一刀。。之前听人地讲过，被剪果阵时系唔会觉得痛，其实系厄人嘅！被剪果一瞬间系会痛架，而且仲会听到“咔嚓”嘅一声，剪得非常之利落。。痛到我叫咗一声“哎呀”！！剪完之后，宫缩又来啦。。医生大叫“用力”，我谷咗一大口气，用力屙！！！不过都仲系屙唔出BB，我仲要叫到“汤猪”咁（我生完之后，我老公话佢系出面听到我叫得最大声）。。BB都仲未生出来，有个助产士帮我抽咗下血（生完之后，果只手嘅皮肤渗晒的血，而且面积都唔细，一大片血迹，淤黑晒）
23：19最后一次宫缩，我呢次将所有嘅力气一次性谷晒出来，好彩BB都好听话，终于将个头仔申咗出来。生佢嘅一瞬间，好明显感觉到盆骨开咗，而且好痛，系果种压迫嘅果种痛。。有D透唔出气咁。。。医生将BB抱咗出来。我见到佢血淋淋咁，D皮肤系浅紫黑色，可能系个肚时间比较长导致呱。。听到佢“哇哇哇哇”系度大叫，心里面安乐唔少，医生帮我剪咗脐带，抽埋脐带血，然后系我个肚大力一按，胎盘自动出咗来。后尾D医生都系继续按我个肚，一来排D淤血，二来促进子宫收缩。不过我流嘅血实在太多了，我听到医生话我流咗300几毫升血。等同于人地剖腹产流咁多血。。最后打咗支麻醉针，跟住就缝伤口，缝咗三层，轮到最后出面果一层，会感觉到痛，痛到我哇哇叫，所以唔系打咗麻醉针缝针就唔会痛。。所有野都搞掂晒之后我成个人好似剩返半条命咁，讲野都讲唔清，无气无力。。最最最后，我要自己爬返落产床，转瞓普通床，被推去病房时，又要自己爬返去病床。。真系超辛苦啊。。。
今次生我个女，真系罗条命去博。。希望佢以后听教听话，生生性性，健健康康咁成长。。
PS：刚出世嘅BB，D皮肤好粉嫩，锡佢果种感觉好似棉花糖咁。。超似棉花糖终身难忘。。