今日落大雨，妈咪我怕滑到，所以等到停雨先返工。翻店前买佐三杯西米捞，妈咪好乖，冇饮芒果椰奶，静係饮红豆椰奶咋！係，杯西米捞係冻嘅，慢慢改啦好冇？
嫲嫲今日又煮咗妈咪最钟意嘅烂饭仔，仲俾咗江珧柱落去添！好好味啊！！！食完饭仔后仲有西米捞同红豆蛋挞食......好幸福哦！！
Twins啊~~今日返工前，爸爸记得同你哋讲乖乖，仲要你哋睇实妈咪......咁你哋就要乖乖囖！

20120420   18W+

琴晚到今朝，好似好长咁......
首先，妈咪我承认我好烂训，琴晚训训吓打开咗个肚肚，可能Twins 冻亲啦~~~所以妈咪我半夜肚仔痛，痛咗成个钟~~~妈咪对唔住Twins......好在Twins俊爹係度陪妈咪，帮妈咪暖肚肚同安抚Twins...

因为琴晚我爹同娘去咗香港，所以妈咪我同Twins俊爹过娘家嗰边训，今日出门口，门口保安话“**，而家计生嘅人来紧，你见肚咯啵~~证件有冇带啊？”“我净係带咗身份证咋啵。”“如果冇带，我建议你最好上翻楼先啦，下午再出去啦！等阵俾人拉上车，又要搞成半日，仲唔知会点！”“哦，咁我翻上楼先啦。”...之后，我兜咗第二条路走，后面一群人经过......

Twins Star要健康哦~~~~Twins俊爹同Joey妈会爱你哋

20120425   19W+

20周啦~~~仲有一半时间就可以同我对Twins见面啦~~！！好期待啊！今日睇妈网，见到有对Twins28周+就出世，所以同对住个肚肚同Twins讲，一定要平平安安，到足月先乖乖出来啊~~虽然靓妈我好想见你哋.......呢件事同朋友讲起，话好惊，朋友话我太担心啦~~唉~~做粑粑麻麻嘅心情，真係而家先了解......

Twins呢个星期开始踢踢啦~~！而家仲係好细力，好似肚肚轻微抽筋咁...好过瘾

20120505   20W+

做孕妈都要「型」

20120505   20W+

琴日，Twins妈---我~~~嫁俾俊爸啦~~！（仪式上）
好攰，但好搞笑嘎~！因为采取一切从简嘅信念（加上有咗5个几月），所以好多事情都简化啦！姊妹同兄弟都係各一个人帮手，开门利是、仪式都省略啦！屋企嚟咗好多锡我嘅亲戚，来到嘅第一件事就係---打麻将！俊爸来接我嘅时候，我...都係喺度睇紧佢哋打麻将！上到楼我就同俊爸讲“嚟咗啦~”。姨妈唔知原来冇开门仪式，一路叫我入房，一路话，点解我出咗嚟...跟住俊爸入房帮我着鞋啦~！斟完茶后，因为仲有时间，所以...继续开台！咁Twins妈我冇得打（礼让原则），所以唯有开庄玩牛牛...结果...就变咗新娘派利是...派咗250出去啦~~~
到咗食晚饭嘅时候，因为係宴客，所以全部都係亲戚，虽然得6围，但係好温馨好舒服！多谢爹哋妈咪细佬、老爷奶奶、俊爸同天上嘅婆婆！我会幸福嘎！！

20120517   22W+

今日，心情好差！好攰！我真係唔想将负面情绪释放俾对Twins，佢哋踢我啊，唔知係咪喺度安慰我？
我而家做紧一份服装店嘅行政收银工，老板同老板娘虽然见我大肚都请我，但係佢哋要求真係好多！好大压力！好多问题要淋！呢排盘点，店入面仲要唔见咗10件衫咁多！上个月唔见咗一条皮带连我都要罚！点解呢？我话过嚟做嘅时候都冇讲过要我做盘点工作，点解要罚埋我呢？我之前係冇理到做Sales嘅同事点去做盘点工作，我只係将表格整出来俾佢哋去对，我之前以为我嘅工作就係咁，点知，原来係更大嘅工作量！连唔见衫都加埋入我数！
妈咪叫我唔好做，我都想唔做啊！但......得咩？！我唔想妈咪担心，所以冇讲到我根本好需要用钱！我唔想靠妈咪，唔想娘家对我而家嘅生活担心！我想靠自己！但......我真係好攰，好攰......俊爸你可否同我分担吓？我执嘢都係想分散吓注意力，我唔想淋咁多，我唔想影响我对宝贝！

20120523   23W+

Twins star喺靓妈肚肚已经6个月啦！所以上次产检嘅时候靓妈就已经预约今日做糖耐+四维+产检啦！因为要做糖耐，所以从琴晚8点过后，我就冇食任何嘢（午饭过后到8点呢段时间都係食咗一个蛋糕+一个苹果），肚饿到连训都训唔到，凌晨两点，发梦发到食嘢就醒咗啦！！俊爸唯有陪我睇电影到4点，咁先训到！所以成晚先训得嗰三四个钟......
今日8点半就到咗421做检查（靓妈产检+生产都係挂靠421）。哇！肚饿到不得了！！因为屋企有一猫一狗，所以空腹验糖耐时顺便抽埋弓形虫抗体（即两筒血），跟住就饮“糖水”，三包糖一杯水！不过，唔知係咪因为肚饿，所以冇想象中咁难饮！饮完，护士姐姐同我讲分别一个钟同两个钟后要再抽多次血，呢段期间必须Keep住空腹！天啊！！好肚饿！好在第一个钟我顺便做埋产检......先重咗两斤！不过，听到Twins扑扑嘅心跳，健康就好！
上午10点9，终于抽完血啦！因为四维约咗11点半，所以嗱嗱声拉住俊爸到M记食咗个套餐，就到4楼照四维啦！因为係双胎，所以要照一个钟（半个钟一个）。首先係左边BB同俊爸靓妈见面，四维医生清楚咁同我哋讲BB嘅内脏同四肢，之后见到BB个样...突然间觉得好神圣啊！睇吓睇吓，BB笑啊！医生捕抓到呢一瞬间！好开心啊！！跟住医生问我哋，知道係同一性别定唔同性别，我话唔知啊，不过如果你肯讲俾我哋知就最好啦在，我哋好买嘢！跟住医生同我哋沟通咗几句，就同我哋讲——如无意外就係【龙凤胎】啦！左手边係男的！医生话我哋好福气，我好开心哦！跟住到右手边嘅BB啦！同样，医生同我哋讲咗BB嘅各项，现时两个都正常，就係偏细。照到两个BB四只脚仔，佢哋成日都喐来喐去，踢来踢去好好动！唔知係咪怕丑，右边BB趴咗喺度，唔俾俊爸见，所以医生话出去活动半个钟，再翻嚟照过！因为俊爸太攰啦！再照嘅时候，俊爸就喺出面凳仔都训咗，活动咗半个钟，右边BB好听话咁转翻身啦（都话佢唔想见到俊爸噶啦！），医生帮BB影埋相后！大功告成！！终于放低咗一半嘅牵挂啦！！
Twins！靓靓妈咪爱你哋！！5

20120528   24W+

不知不觉，BB系我肚入面已经7个几月啦！时间好似过得好快，又好似过得好慢。从拍拖，到结婚，到而家...就一年时间吧！呢一年除佐甘，仲发生佐好多事...好多始料不及既事，好多繁琐既事。搞到自己好情绪化，好忧郁，好烦，好唔知自己想点！究竟点解会甘？究竟点解？点解越来越唔似我？定系呢个先系内心既我？点解唔放开D？点解要俾时间我淋野？我真系好迷惘...我唔知自己想点...究竟想点！

20120708   29W+

一生人或许只有一次这样的机会，所以在朋友介绍下到了影楼拍孕照！比较自由！

就两套衫，俊爸可以一齐影~~留个纪念啦！！

http://www.gzmama.com/forum.php?mod=viewthread&tid=3080820&fromuid=7442458

20120710   30W+

悲催啊！琴晚才发现我的妊娠纹在悄悄的成长！之前仲同人讲自己无出妊娠纹...而家...好悲催啊！！！

20120714   30W+

仲有唔够一个月,就到预产期啦!Twins Star,靓妈同俊爸都等紧你哋!呢排右边宫缩好多,抽住抽住!肚皮好薄啦~~~又痕啦~~~夜晚去厕所又频啦~~~妈妈同奶奶都怕我会早产啊~~!但两个baby要挺住啊!!!喺肚肚入面再养吓~~~再养吓~~~!爱你哋!!!

20120805   33W+