crystal_cheng今日已经过咗预产期两日喇。。。BB似乎仲未有动静想出来。。。突然想起，从怀孕到宜家，娜娜似乎都好少影相，嗯嗯，不如趁宜家仲大住个肚仔，影返几张相留念一番，将来BB大咗，都知道妈咪曾经怀住佢嘅时候系点样嘅。。
由于老公早早就瞓着咗，娜娜唯有自己影，行入洗手间，对住全身镜影咗几张。。呵呵，上图！
唉，宜家睇返D相，真系好丑样。。。脚又肿，人又肥。。。BB，你要记住妈咪为咗你，连身材都唔顾呀。。。
影完几张相，准备冲凉瞓觉喇。。。瞓到半夜。。突然发觉好似有小小水从下体流出。。马上醒咗，入去洗手间“检查”一下先，睇下系咪破水。。但睇落又唔似，量太少喇，似系赖咗小小尿。。呵呵，唔准笑娜娜呀。。。处理好“问题”后，继续瞓觉。。连续几晚小腹阴阴痛，但系冇乜规律，通常大半个钟至一个钟先痛一阵，所以一定要趁冇乜唔舒服嘅时候抓紧时间休息！
10月21日上午8点
通常娜娜瞓觉都会瞓得好沉，基本上唔会因为想去厕所而醒，但系今日上午，突然“灵感”到，去洗手间嘘嘘。。。哗。。底裤仔上面有几滴鲜血呀。。娜娜第一个反应——见红！但系由于冇出现破水或规律性嘅宫缩，所以娜娜都唔系太紧张，先刷牙洗面，换好衫，然后再慢慢叫老公起身：“喂喂，我见红喇。”老公听到之后，醒咗，又准备瞓返，仲同我讲，瞓多阵先喇，宜家先至见红，有排都未生得呀。。。晕。。虽然我唔太紧张，但系见红都应该去医院，呢个常识我仲系有嘅。。所以努力咁样叫佢起身。。最后终于起身喇，同老爷奶奶讲咗，然后老爷去截咗部的士（唉，我地住得实在太偏僻喇，的士都唔入来，老爷要开部摩托车去叫的士……），我同奶奶仲有老公就齐齐向佛山妇幼进发喇。。去到医院，马上挂号产科门诊，上到妇幼五楼，见到D姑娘太忙喇，当我准备同佢讲我见红嘅时候，未开声，佢已经叫我排队响另一边。。等咗差唔多十分钟之后，终于见到一位稍微有空闲嘅姑娘，马上拉住佢同佢讲，我预产期过咗三日，今早见红。姑娘马上安排我去见医生。。检查过程中，我发现医生旁边多咗一个实习医生，检查系由实习医生做嘅，晕死，佢竟然连胎心都揾唔到。。仲要问返我平时医生检查系听左边定右边。。。晕。最后都系由带岗嘅医生检查。医生见我未有宫缩，而且已经冇再流血，检查过宫口完全未开，就话，从见红到生得，起码都要一两日，问我要唔要返屋企再等等。。我地住得比较远，最后选择咗住院待产。。今次系娜娜第一次住院。。好紧张
从医生写好住院申请，到办好晒住院手续，差唔多用咗一个钟头，当时奶奶就响度讲笑话，如果好似佢当年生老公嘅时候咁紧急，四五个都生咗出来喇。。哈哈。。
响我地出发去医院嘅时候，我顺便通知咗老妈，老妈马上通知老豆，响我地揾到病床安顿好之后，老妈老豆都来到喇。。住院呢几日，就由老妈陪住我。
住院第一日，常规做咗D抽血嘅检查、胎心监护咁样，冇乜动静。。今晚老公响医院陪住我，老妈返咗去阿姨度休息。
10月22日
住院第二日，仍然冇乜动静，睇来BB仲未想出来。做咗个B超检查，胎盘先到2度，隔离床嘅准妈妈37W都已经3度喇。。娜娜嘅胎盘仲好新鲜，营养唔错喔。。唔怪得BB仲想继续住喇。。当晚同屋企人商量过，决定听日同医生讲，要求催生。其实娜娜唔太想催生，但系屋企人话过两日系重阳节，BB出世唔系太好喔。。所以都系催喇。
10月23日
早上醒咗，仍未有动静。。等到医生来查房，我就主动同医生讲，要求催生。医生联系咗产房帮我做检查，十点钟我就去咗五楼产房。。原来产房系唔允许家属进入，娜娜一个人入去，感觉有D惊喇。。十点二十分，医生帮我检查过后，话俾我听胎位正，胎盘仍然有营养，建议等到41W如果再冇动静先至催生。。我妈提醒过我，如果医生咁样同我讲，都叫我坚持催生，所以我同医生讲咗，唔想再等喇。然后医生话，宜家产房比较人多，问我安排听日有冇问题，我话冇。当准备行出产房嘅时候，一位姑娘叫住我，话宜家有床位喇，问我今日催唔催，我话好，就开始咗我嘅生产旅程喇，当吊上催产素，望望墙上嘅大钟，正好系十一点。。。
刚开始半个钟，冇乜反应，娜娜然后好轻松，到咗十一点半，开始觉得肚痛喇。。。感觉就好似月经痛咁样，但系痛嘅程度就大D，暂时仲可以忍受，计过时间，刚好五分钟一次，每次持续大概一分钟。。。。妈咪送饭来喇，但系唔准入，系由姑娘送来嘅，然后就收到短信，妈咪叫我食多D饭，食多D饭先至有力气。。慢慢，痛嘅程度就开始加大，每痛一次之后，趁下一次痛之前，马上食几啖饭，都未赶得切吞，又来下一次痛喇。。。虽然辛苦，但系仍然仲可以忍受。。。下午一点，姑娘入来检查，开咗0.5，话进展得唔错，继续加药。。直到下午两点，娜娜终于感到难受喇，疼痛越来越厉害，眼泪不自觉咁样流出来，打电话俾老公，佢今日仲系上班，无良老板唔俾佢休息，激气。电话打通咗，都未讲到嘢就开始喊。。我都唔记得自己讲过乜嘢，只记得我话好痛呀，你过来医院喇。。。今日生得架喇。。。三点几钟，老公终于到医院，但系都只可以响产房门口等。。娜娜响产房入面，觉得好无助。。。接近四点，疼痛开始忍受唔到喇，娜娜放声大哭，虽然用咗呼吸法，但系疼痛仍未有好转，姑娘入来闹咗我好多次，话人地到生嘅时候都未有喊得咁大声，话我咁吵会影响其他产妇。。。晕死。。检查，开咗四公分。。离最终目的十公分仲有一段距离。。。最后姑娘入来安慰我，话滴到五点就帮我检查，同埋叫我唔好叫得咁大声，一来会浪费体力，另一方面会容易令BB缺氧。。继续忍痛直到五点十五分，姑娘入来检查，开咗四点五公分。叫我行入产房。。入到产房，见到其余三张产床都系产妇，有D响度缝针，有D响度等待，有D响度用力。。娜娜好努力爬上产床，产床比病床仲要细，感觉转个身就会跌落去咁样。。。疼痛仍然继续，娜娜已经痛到缩埋一团。。突然听到旁边有BB仔嘅喊声，俾咗娜娜好大嘅鼓励，既然上到产床，已经去到最后一步喇，坚持！！讲返起又奇怪，虽然咁痛，但系娜娜从来冇动摇过顺产嘅决心，一直都冇谂过话要求开刀，可能自己潜意识唔想自己挨一刀吧。。呵呵。。讲返产房入面，娜娜一直响度等，每一个钟有姑娘过来检查一次，六点半，仍然系四点五公分，冇再扩大，医生过来检查后，通知继续要滴催产素，娜娜见到呢樽嘢就怕怕，因为知道滴呢樽嘢，会越滴越痛。。七点半钟，痛得太厉害，谂起无痛分娩，要求做无痛，然后医生联络麻醉师，后来先至知道打呢一针，要五百几蚊，但系痛到实在冇办法，对比开刀，五百几蚊唔算得系乜嘢。。。麻醉师一直未到，医生八点半检查宫口，仍然未到五公分，医生决定人工破水，之前上网睇过，话破水唔会痛，但系宜家先至知道人工破水，都会好痛好痛。。。。医生挖咗好耐，突然间娜娜觉得好似赖尿咁样流咗好多水出来，医生话俾我知，破咗水喇，应该会快好多架喇。。九点，麻醉师终于到喇。。娜娜侧躺，麻醉师响背部打咗一针，三四分钟之后，宫缩嘅疼痛真系减少咗好多好多，呢个时候娜娜终于觉得攰喇，想瞓一阵，姑娘叫我马上休息一下，仲问我食唔食饭，我妈带咗饭来，我已经食唔落喇，完全冇胃口，最后姑娘建议叫我通知家人买D粥入来。。小睡咗一阵，醒咗发现产房已经得返我一个产妇响度，其他人都已经完成任务喇。。唉呀，BB，你个花名要改做“包尾”先得喇，早过人地入来，人地都走晒喇，你都仲唔出来。。。等到老妈送来粥之后，姑娘喂我食完，娜娜仲饮咗两樽白兰氏鸡精同食咗一排朱古力。。十点，疼痛又开始喇。。姑娘检查，开咗六公分，宫缩仍然唔系太稳定，仲要继续等。直到十一点，医生再次检查，话已经开咗喇，叫我一感到痛，就开始用力，由于宫缩唔稳定，三四分钟先至有一次强烈宫缩。。所以医生都唔敢行开，一直睇住，我一感到痛，就开始用力，用咗两次力之后，医生话见到头仔喇，由于第一次生BB，所以要侧切，未等我回应，医生就已经剪咗，哗，原来都好痛架。。然后医生先至开始换衫，准备工具，当一切准备好晒，就叫娜娜再次出力。听到姑娘话头仔出来喇，继续出力。。。经过几次用力之后，医生拉住BB嘅头仔，将BB拉咗出来喇。。突然感觉肚腩空空如也，都唔知系一种点样嘅感觉。两三秒后，听到BB喊声喇，“哇哇……”系娜娜嘅BB喊呀。。。感动，终于生咗喇。。系小公主。望望大钟，凌晨十一点半，痛咗十二个钟，终于生咗出来喇。。
BB整理好之后，就推到我旁边，当时我仲缝紧针，唔郁得，只可以用手机随便影一张，然后马上发俾家人。。上图——
后记：关于呢个生产过程，娜娜仲有嘢想讲。仲记唔记得之前讲过住院之前系由一个实习医生帮娜娜做检查？呢几日唔知点解，医院有好多实习医生，响产房嘅时候，医生一般都带住一两个实习医生，大家知道咁样代表乜嘢吗？每当医生检查娜娜宫口情况嘅时候，就要俾医生同实习医生一共挖两三次。。。呢个都唔算系乜嘢，最可怕嘅系侧切同缝针。。话说当医生剪完，娜娜生完之后，医生就行过来睇我切口，然后娜娜好清楚咁听到医生同实习医生细细声讲，呢个位置唔应该咁样切架，应该点点点。。。汗。。仲要俾我听到，晕死。。不过算喇，唔剪都剪咗咯，缝针喇，娜娜当时睇唔到，原来缝针都系实习医生，刚缝咗两针，痛到喊，麻药药效已过，医生行过来睇睇，然后又同实习医生讲，呢度唔应该咁样缝架，你睇住我点做喇，然后娜娜感到下体好痛，原来医生将之前实习医生缝嘅线拉返出来，再缝过。。晕死。。。。彻底无语。。。不过虽然有呢段插曲，但系娜娜嘅生产过程尚算顺利。希望BB身体健康，快高长大！呢篇嘢足足写咗个半钟，好攰喇，发两张BB近照之后，娜娜要去休息一下喇。。
[ 本帖最后由 crystal_cheng 于 2009-11-1 18:45 编辑 ]
crystal_cheng楼
6 唔可以用空间嘅相架？？？我一阵改改~
那会要了我的命~~你太坚强了！
