我有咗7个月啦，而家系屋企待产，无返工，即系话无收入啦……好在仲有少少积蓄，而且老公屋企算系家境唔错，都会接济下我哋。
       但系而家问题系，我嘅老公真系一个大细路，谂野唔长远兼且唔理后果，我讲过几百次话BB出世之后有好多地方要使钱，我自己又无可能一生完即刻可以返工揾钱，所以我哋D积蓄要悭D使，该用嘅时候先用，唔好使系D唔等使嘅地方。
       老公次次都会大声应承，话佢知道嘎啦，咁大个人做野有分寸嘎啦！点知转头又唔记得咗。佢自己有架私家车，之前用咗唔少钱去改装，我话佢两句就发嬲。我话第时BB无钱买奶粉系咪又要摊大手板问你妈咪拿啊？!你唔丑我都丑啊!你妈咪唔单只要养你，仲帮你养埋你个仔同老婆！跟住佢唔出声，之后好耐都无动静，我以为佢听话啦！点知后来有人爆料，原来佢一样系有继续改装，只系因为我外行，从外观睇唔出佢改咗边！
       呢排，佢迷上玩四驱车。无错！系好细部果D四驱车！开始我觉得人应该有自己嘅兴趣，比佢玩下无所谓啦！点知，佢越玩越离谱，呢两个礼拜单单买零件改装就使咗两三千蚊……！仲犀利到买埋条大赛道翻屋企，放系我哋间房，占咗好大地方！佢完全唔理我大住个肚，都唔惊我会踢亲个赛道跌倒，前晚夜妈妈仲同个F系度玩到鬼杀咁嘈！D马达声好刺耳，BB可能吓亲猛踢我。唉，我同佢讲佢根本听唔入耳，讲得多又嫌我烦，我都唔知应该点算！
       我同佢年纪都唔算细啦，但系佢屋企人眼中仲系细路仔咁，我唔想比佢地觉得我地无用！但偏偏我老公未受过苦，老豆妈咪又锡佢，讲难听D就系个二世祖。以后我应该点同佢讲，令佢知道自己嘅责任……？唉，好烦、好烦！