妈妈唔系广州人，但系就非常中意整猪脚姜。仲记得细个嗰阵，妈妈同婆婆用火烧热火钳辣猪脚啲猪毛，猪毛烧窿嗰阵好特殊嘅味道。妈妈过身之后，就冇人整来吃啰。嫁咗个客家老公，生女坐月都系吃鸡酒，冇吃到广州特有坐月佳品酱醋。上年整咗两煲，分派俾亲朋戚友，特别我奶奶话好好吃喔！所以今年一于再整多煲，而家秋风起，最适宜整来吃嘎啦。我嘅整法都系集大家之大成，好简单。我觉得猪脚姜唔难整，整到啱自己口味就OK。我唔中意酸嘅酱醋，我中意甜少少嘅，中意多啲猪脚，死党就唔中意啲姜咁辣，奶奶中意系因为老人家都中意甜嘅嘢，哈哈。

上年用嘅系海天添丁甜醋，舅妈整俾我表嫂嗰煲酱醋俾人投诉话太酸，所以上年整嘅时候特等放多咗红糖。市场卖我猪脚嘅阿叔中意用致美斋嘅醋，条条大路通罗马，最紧要自己中意。今年我用嘅系八珍甜醋，大大盎，3升庄。百佳买嘅，好意头嘅价钱：99.9。猪脚买咗两只猪后脚，斩件之后都几多下，十个人吃绝对冇问题，人地八珍甜醋个盎度写3升甜醋配一只猪脚是10嘅分量，咁就知我几中意吃猪脚喇，又难怪我咁肥嘅~~姜我唔识点分老同嫩，有无MM可以分享下哩？我切姜嗰阵有好多姜丝，应该系比较老嘅姜，死党唔知接唔接受得到哩？鸡蛋就随意啦，中意剥壳又得，唔中意剥都得，而家鸡蛋啲壳薄次次咁，都唔方多钙，我就剥喇！原本仲惊一大煲嘢3升嘅甜醋唔够添，想买多埕添，好在冇冲动，啱啱好。下面就上做法啦~~

注意，整嘅过程中唔可以有半滴水，如果唔系煲酱醋就唔摆得几耐，当然喇，唔系要摆一年半载嘅，好易坏咁啫。

1、
猪脚斩件飞水，而家猪肉档好有交代，会拿剃须刀帮你刮晒啲毛毛，其实吉列系列可以考虑下呢个创意啊？GOOD喔！几贴近民生啊，哈哈，偏题鸟，继续。飞水去腥味，师奶们都懂的。

2、
姜要刮晒啲姜皮，切片，厚薄随意，老公话薄啲冇咁辣喔，唔知系真唔系。

3、
鸡蛋如果剥壳就预先煮熟，剥壳，晾干啲水分

4、
煲酱醋嗰煲都要预先晾干水

5、
街坊阿姨仲有猪肉档嘅阿叔都教落话要落少少油爆爆啲猪脚同姜，猪脚我就唔中意落油爆，你唔落得多嘎嘛，爆爆下，火大少少就标晒烟咁，好唔中意。我就系烧红只镬，落猪脚，翻炒到猪皮颜色有少少变黄，闻到有啲香味就OK。我屋企只镬好细，猪脚又比较多，我分咗两次爆。

6、
炒姜我就放少少油喇，不停炒炒炒，闻到姜嘅香味，至于点样为之干水，凭自己感觉喇，炒得三四分钟，不停咁炒，乜都干喇~~

7、
姜炒得差唔多就放埋头先炒好嘅猪脚一起再炒炒，等它啲提前结合下

8、
将炒好嘅嘢放入个煲度，我嗰煲叫大黄，我同它起咗个花名，因为它真系好大，嗱来煲汤好大材小用，上几个星期为它添咗个小伙伴就小白，小白煲汤就啱啱好喇~~大黄就专门嗱来整酱醋，啲材料整整一大煲，差唔多到顶，可想而知啲猪脚有几多。

9、
落鸡蛋系面头

10、
放醋，八珍甜醋嗰盎好靓，放完醋洗干净我准备嗱来整泡菜。啲醋啱啱浸过材料面，PERFECT

11、
开火煲滚，滚之后再细火煲40分钟就得。如果唔系即刻吃，可以每天翻煲两次，咁样啲酱醋就越来越精华喇~~