双胎妈妈中山一院生产记-大B院内发生严重感染三个星期出院
320416怀孕妈妈
dolls236拍拖既时候就已经好想要BB了，结果一直到登记、摆酒都没有消息，每个月都是一次失望，在我已经不抱期望的时候，居然发现有左，果一刻真系好兴奋，我都唔敢相信，用左好多支验孕棒，最后去医院抽血我终于相信我系有左了！记得第一次B超既时候，医生淡淡咁讲左句：双胎，都有胎心。。。我真系超级激动。。。哎呀，题外话讲多左，入翻正题先！
12周建档后，我一直都系稳蔡坚教授产检的，到后来亦都系距帮我操刀！蔡教授人好好，态度都比较好，后来住院的时候发现王子莲教授都好好，不过就严肃好多咯！由于是双胎，我从一开始就被定义为高危妊娠，所以从16周开始我就两星期产检一次了，无奈我的肚子长得好疯狂，从22周起我就已经感觉到频繁宫缩了，当时真系好惊嘎！好几次都差D要入院保胎了，好在都系有惊无险，终于熬到30周，一开始蔡教授比我既目标系熬到37周剖，但后来呢个日子不断提前，就系33周产检既时候，因为宫高已经39了，而且宫缩越来越频繁，蔡教授开入院单比我了，建议我先入院，但系住院真系好无聊，所以医院通知入院既时候我自把自为推左，话想迟D先入院，点知到34周产检既时候，蔡教授一量，我宫高已经去到45了，而且心脏彩超既结果显示我已经心房增大而且有心包积液，蔡教授知道我推左唔入院就好嬲，距问点解唔入院啊，你知唔知你咁样好危险嘎！手忙脚乱之中我妈即刻帮我去稳床位，就甘样下午我就办入院手续开始我既住院生活了。。。
中山一院孕妇区一般住既系住院保胎或者待产既孕妇，每日早午晚都有护士过来听胎心，另外每日都要做胎监！住院后医生要求家属过来谈话，医生大概既意思就系由于我系双胎，所以心脏负荷已经好大，宜家已经心房增大同心包积液，再拖落去大人会有危险，但系BB宜家只得34周加，生出来既话就系早产儿，但系因为已经有34周，所以发育已经接近成熟，宜家你地就要系大人同BB之间做一个抉择了，当时老公就好果断，提前生吧！决定左之后医生就拿出好多生死状比我地签了，签完之后就要预约手术室了！由于我情况特殊，所以医生唔比我系11楼产房生，要预约综合手术室生，因为抢救设施比较完善，就咁样，我既手术时间同地点终于敲定左！
终于到左手术当日，护士六点几就来叫醒我准备了，我当时真系好紧张呀，虽然之前都睇过唔少生产日记，但轮到自己的时候仲系会紧张！我原先好怕插尿管，但其实还好，就系酸酸涨涨咁，好想屙尿但又要忍住咁，另外，中山一院剖腹产系唔需要剃任何毛毛的哦！准备好之后我就被推上手术室了，一开始医生话我大概九点几手术既，我仲叫我老公七点几来到，结果我都未见到我老公就已经入左手术室了，不过手术室里面既医生人非常好呢，我话我手术前想见一下我老公呢，距就推我出去见了，期间一直都系度陪我倾计，叫我唔需要紧张，我打左针觉得口干，距就帮我湿下个口并提醒我唔好吞！等左好耐，麻醉师终于来了，系一个年级比较大既教授（由于我心脏唔好，所以我麻醉既位置系胃以下，一般剖腹产系可以麻到心脏以下的，呢个直接导致我后面既痛苦），可能系我个肚太大，我根本弯唔到身，而且我有小小水肿，所以医生打左好耐都未打到麻醉，后来个教授打到唔耐烦了，竟然过隔离手术室叫左距个学生过来帮我打！另外仲叫左两个好大只既助手按住我，距个学生打左一次，跟住就话打好了！跟住距拿笔督我，问我痛唔痛，我不断话痛，因为我真系好惊，我惊距地未打好麻醉，后来距有小小唔耐烦了，大声咁讲：有感觉唔等于有痛觉，我再问你一次痛唔痛！我依然系答：痛！跟住距直接话无可能，开始手术！我当时未来得切惊，已经感觉到手术刀划过肚皮了，原来系真系唔痛既。。。。
手术既过程无其他妈妈讲既咁轻松，什么医生都系度倾计之类的，我既医生个个都表现得好紧张，蔡教授不断系度发号施令，我觉得我一直系度比人拉扯住，胃既位置比人按到好痛，好辛苦。。。我开始觉得有D模糊，想闭上眼，跟住我听到有人叫血压掉，蔡教授好紧张，即刻叫人上药，吸氧，过左一阵，我听到哇一声，我知道系BB出来了，好快我又听到第二声哇一声，我当时好激动，眼泪不断涌出来，我死系度喊，好多助手过来安慰我唔好喊，跟住我觉得好想呕，我大叫我好想呕呀，跟住有个助手拿个盆过来帮我接住，呕完我又大叫好痛呀，蔡教授即刻叫左麻醉师过来。。。就系呢个时候助手抱BB过来比我睇了，我当时头昏眼花咁，根本无好好咁睇下BB，事后我亦都唔记得我自己讲既系仔定女（可能我讲既系仔，因为之前B超照过系两个仔）BB好快就被抱走了！终于到左缝针既时候，我神智终于清醒小小了，我问生完了吗？蔡教授答我已经缝紧针啦，我再问，我系咪生左两个仔呀，点知蔡教授答我：啊？你刚刚自己没有看屁股吗？我们只负责接生哦，不负责看屁股的哦。。。所以，直到我推出手术室，我都唔确定我系咪生左两个仔。。。后来我见到我老公既第一句说话就系：究竟我系咪生左两个仔。。。而我老公居然答我：吓，乜你无睇咩？个医生拿出来，我无问涡。。。结果，究竟我系生左仔定女，我系到左第二日有护士来派BB既抽血卡，我先睇到上面写住两个都系男。。。
生完之后要吊6个钟头宫缩针，有人话觉得好痛，我就觉得还好，好似来M咁，不过护士来按肚子就真系非一般痛，每次我都会惨叫几声，不过中山一的护士都算好，都会就住你，唔会强行按落去！由于中山一院床位实在太紧张，距地既政策系顺产48小时出院，剖腹产72小时出院，因此我就系生完第三日，落床呼吸都会痛既情况下出院了！由于我两个BB都属于早产，所以一出世就入左新生儿科观察，因此我出院既时候BB都仲未可以出院。
对于新生儿科，我觉得唔系是非必要，真系唔好入！首先一入去，由头发到脚趾尾，所有野都要检查一次，每日最基本既费用要一千以上，如果做埋检查就要几千蚊一日。虽然我BB系早产，但距地体重都有5斤以上，而且出生时评分都系满分，所以应该系可以唔入新生儿科的。我隔离床既一个妈妈就好好彩，距同我一样都系35周早产，BB出生评分都系满分，本来医生都要距入新生儿科，但最后因为无床位而无入到！因为如果无入到新生儿科，可能就唔会发生后来既事。。。
中山一院既新生儿科只有一三五下午三点到五点可以探视同问病情，探视既时候连影张相都唔比，护士推出来匆匆望一眼就即刻推走，生完之后每日都好挂住BB，有时睇到其他妈妈生完即刻可以抱住BB系身边，自己真系会偷偷流眼泪，BB入新生儿科后情况一直都几好，所有检查都无乜问题，终于盼到第七日，医生话BB都无乜问题，应该听日可以出院了！当时真系好开心，终于可以带BB翻屋企了，点知第二日七点钟，医院打电话来了，话大B寻晚半夜发生严重感染，心率不稳，呼吸一度暂停，由寻晚三点开始抢救到宜家。。。我当时一听眼泪就已经流落来了，我地一家人即刻赶到医院，但医生好忙，一直抢救紧，只系出来同我地匆匆讲左几句同叫我交押金同埋买支丙种球蛋白上来，因为之前交既一万蚊押金已经用完，宜家已经过唔到数停药了！我即刻又去交一万蚊押金，之后我地一直守系新生儿科门口，但医生都忙住抢救无出过来！呢个时候另外有医生出来叫我帮细B办出院手续了，无办法，细B要出院了，我地一家人唯有先带细B出院！翻到屋企之后系最难熬既时间，一来要忙住照顾细B，二来一林到大B既情况我就忍唔住流眼泪！到左第二日早上，医院一直都无电话到，我本来仲以为系咪大B情况已经稳定翻，点知下午医院就打电话来要我地两公婆到医院，教授要同我地倾病情！一去到医院，我见到医生拿左两套无菌衫出来叫我地穿上，之后话BB宜家情况都几危险，你地入去睇下距啦！我当时眼泪即刻吧啦吧啦咁流出来，我好惊系我见BB既最后一面，你出世之后妈咪仲未好好咁抱过你。。。医生带左我地入重症监护室，我见到BB上左呼吸机，口同鼻都插满管，带住个眼罩训系度，完全无动过，医生话为左更好治疗，帮BB打左镇静剂，所以叫距都无乜反应。。。我即时喊到几乎晕低，几个医生扶住我行翻出来，我老公系隔离都不断流眼泪。。。后来医生同我讲BB系发生左严重感染，导致败血症，但感染部位宜家仲未知道，估计系肠道，但距地已经及时用药之类的。。。另外，仲有寻日交既一万蚊押金又用晒了。。。我即刻话无问题，押金我即刻去交，我地两公婆几乎系求个医生，无论用几多钱，一定要救翻我BB。。。医生都不断安慰我地，话会尽力抢救，由我BB发生感染到宜家，距都一直无训过，都系通宵守系我BB身边。。。
终于，大B系医院住左三个星期之后都平安出院了！事后好多人都问我，点解会咁嘎？点解系医院里面都会发生感染嘎？医院系咪要负责啊？点解唔追究医院责任啊？其实，我都唔知点解会咁。。。大B可以平安出院我已经好满足，我唔想追究乜野，我只想要翻我BB，另外，无论点都好，我知道医生真系有尽心尽力去抢救。。。
中山一院生产记终于完结，希望我既大细B可以健健康康咁快高长大！
2013/02/20
little_icy
dolls236楼
七福晋
Tweiggy
皓月那蓝
