产房惊魂（囡囡已经八个多月啦）

时间过得真是好快，我已经升级左做人地妈咪八个几月啦。呢八个几月黎，真是我人生的一大转变。我无林过我可以如此母性。我依家先体会到人地成日讲的果句说话“结婚对一个女人黎讲无咩改变，而生BB就完全改变一个女人的命运。”

我承认我是一个懒人，生左BB禁耐都无写D咩同大家分享我自己感受。今日突然间想同大家分享我呢几个月来的喜怒哀乐。但唔能够一下子全部都写晒出黎，所以先同大家分享我生BB的过程先，可能之后有时间的时候会同大家分享我凑BB的经验同感受。

1. 产房惊魂篇

记得我未到预产期的时候我已经开始心急啦。因为每日都度日如年，而且肚越大个人就觉得好唔舒服。日头去街行一阵就会觉得好累，而且因为个肚压住个膀胱搞到成日稳厕所好麻烦。晚上点训都训得唔舒服，总之成晚郁黎郁去，左左右右，好似张床有钉禁。

我成日以为我会比YCQ（预产期）早生，但YCQ一日一日禁过啦都仲未有消息，等到40周＋5的时候我已经等唔切啦所以就去左医院做左一次产检。当时医生仲同我讲我BB比孕周细，宫高只有32（其实后来上网睇先发现，依家外国已经唔会量宫高黎做参考数据架啦。）但因为已经过左5日所以叫我考虑入院，我当时林都唔林就答应入院啦。因为10月份是生BB的高峰期我怕无床位（结果真是好多人要训走廊）。10月21 日系屋企人的陪同下我就入左医院。老公帮我返屋企拿个“走佬袋”（生前一个月要准备好啦）俾我。入左院之后的头一日都无咩特别，都是吃完就训，训完就同D同我住埋一间房的准妈咪倾吓计。直到23号凌晨的1点钟开始有动静啦，下面开始流血（好似月经第一日禁），伴随有轻微的宫缩。后来经医生检查之后就要我马上去产房侍产啦。当时其实我真是有D兴奋同开心，但后来......

去到产房根本无我想象得禁好，一开始医生就帮我绑上胎监训系果个待产的床上面。开始因为唔是禁痛所以就八挂周围望。点知一望就望倒对面有人接生紧。哗！！真是好恐怖啊。对面有三到四张产床，分别训晒果D系度生紧的人。叫到要生要死。仲听倒有人叫救命，超级大声“救命啊！我就要死啦。你地再唔黎帮我，我就死俾你地睇！”我心林，我自己都好怕痛唔知我生果时会唔会仲叫得俾她大声。我尝试地分散我的注意力，我开始向隔离床的望过去，想稳人倾吓计。点知！隔离床果条油痛到咬紧自己同用手扯紧自己的头发。我点自己讲，我眼花姐，唔是真是。我再向另一边望，重衰！果条油用头撞埋墙！我开始觉得我自己唔是系产房而是入左精神病院。重要的是，我带去的所有勇气都俾我见倒的听倒的都吓走晒。

我开始要求医生俾我返病房，但医生唔答应话我开始有宫缩。系呢个时候唔知点解有好多BB都想出世，所以黎左好多急诊的人。后来医生见我仲未生得就推左我入果间温馨产房待产，于是就免费体验左一次温馨产房。其实温馨产房亦都是不外如是。入面就是一张产床同埋一张凳。设备简陋仲话要收750，好在我无上当。但是呢个时候我已经唔再痛了，宫缩都好似无禁。可能是头先俾D人吓亲。系温馨产房里面又冻又无人理，下面又唔俾着裤又流住血。唉～～仲要时不时听倒外面D人大叫痛同埋一阵BB的哭声。搞到我成晚都无训，望住个钟一个一个钟头过去。呢个时候我都无打电话俾我屋企人，因为我知道离我生得的时候都仲有一段时间。与其叫他地系外面等不如系屋企训多阵啦（我觉得我自己真是识得为人着想姐～～嘻嘻）一直系产房等到早上8点，我再忍唔住系温馨产房的又冷又饿又无人理的感觉啦。其实我系半夜的时候早就落定决心要开刀啦，我真是无勇气再挨落去。医生成日过黎帮我做阴检，果种感觉真是好想死。所以一到天光我就打电话俾我老公叫他黎签名做手术啦。系之前仲有段小插曲。

到早上8点的时候医生过黎巡房，我极力要求医生帮我开刀。点知个医生竟然话“唔是你想点生就点生架，我地睇吓你的宫口的情况如何先决定。”我听完之后就火都黎埋就开口大骂“家吓你生定我生啊，如果我阵间生唔倒是唔是你负责任啊！个BB有咩事是唔是你负责任啊！你真是讲得搞笑啊你！总之我依家要就开刀生。如果我有咩事，我实投拆你！”唔知点解我本来已经无力架啦，点知我听完个医生讲之后真是好激气。不知闹得他几爽。之后他叫我稳家属黎签名。我就急call左我老公黎签名啦。到左9点几医生话下一个就到我开刀啦。跟住D姑娘就帮我打吊针，插尿管。同埋打左一支震静剂。打完之后就成个人迷迷糊糊禁俾两个姑娘扶左我入手术室啦。

入到手术室，突然见倒有成20几个人系入面。大概是D实习生。我呢个时候都唔理得禁多啦就训上左张手术床。跟住有个人过黎同我讲“我是你的麻醉师，一阵有几个步骤要你配合的。”之后就系我背瘠度打左一针，我就是记得果一针真是好痛。但之后就觉得下身凉凉地，个主刀医生几时郁手我都唔知啦。我净是感觉倒个肚好似俾人好大力扯禁的感觉。之后就听倒有BB的叫声啦。哈哈～～BB女出世啦。我未见倒BB之前就听倒人地话我BB好白净好可爱。D姑娘仲玩左一阵先俾我睇添。可能我无晒力所以都无咩表情，个姑娘俾你睇BB的时候我仲问我是仔定女，我就答左是女。之后我仲傻到数BB的脚指是唔是10粒。林起黎真是搞笑啊。

过左一阵，医生缝完针之后仲称叹话个伤口缝得好靓添！后来我就被推出产房啦。见到老公，妈咪同爸爸都好兴奋啊！我自己就已经累到无晒表情啦。

系产房等左10个钟头，最后开刀生左我的宝贝女。呢一切一切是我呢世人都唔会忘记的。睇住我刚出世的女，就算几辛苦都值得的。

上一张BB出世第一天的相和近照

[ 本帖最后由 mimi129 于 2009-7-20 18:18 编辑 ]