送花花，B仔乖乖哦！ 住左几日医院？洗左几多米啊？[ 本帖最后由 appleye 于 2009-8-18 19:05 编辑 ]

过程有点恐怖，不过ＢＢ好可爱．我都好期待我ＢＢ出生．．．

BB好可爱啊!我都系顺产噶,其实顺产都悟系好痛借~我50分钟就生咗出来噶!哈哈!超快~ 送花花比BB

三号晚十一点破水赶去市妇婴，十二点进入待产房，捱左超过十二个钟头连催产素都打埋，结果一指都无开。最后惟有剖腹，收获B仔一个！生产过程迟下出院再补。只系想讲下暂时觉得最恐怖系阴险同插尿管。因为生完后第一晚插住尿管好痛苦，训着发梦都被阴检！哈哈～不过BB劲得意，日日望住距偷笑！BB过咗12朝啦，依家来补翻我嘅生产经历啦！！ 生之前睇咗好多人写嘅，不过大多数都係顺产嘅经历，记录中就只有一只字：痛！而我就糊里糊涂咁做作人阿妈。       人家话，顺产就係生之前痛，而剖腹就係生之后痛。而我虽然係剖腹，就貌似生完之后都无太大嘅痛楚，只係就住个伤口咁。好啦，废话少讲，来讲下我生仔当日嘅经历啦。        8月3号晚，因为係星期一，如常咁喺自己屋企。因为我铺床太软，所以星期日晚开始就同妈妈训，爸爸去训我铺床。晚上，仲同老公倾电话，一D要生仔嘅预感都无（有D人话有预感噶！）。一直都好心急，好想佢快D出来，因为佢每晚都踢到我肋骨痛，肚又大喔，睡眠质量非常差。记得果晚10点多D就上床训觉，不过上床之后一直都训唔着，去咗两次厕所。就係喺第二次去厕所嘅时候，突然停到“扑”嘅一声，然后就有好多水流出来。啊~~莫非呢个就係传说中嘅破羊水？于是立即翻入房叫妈妈起床，过程中水仲不断流出来。        “阿妈，快起床啦。我破水，要立即去医院。”        于是，妈妈就立即去隔离房叫醒爸爸。水仲係不断咁流...当时真係有D惊。因为妈妈网上面得知，如果羊水流晒，BB就会缺氧。所以我就立即训喺沙发度等爸爸妈妈执嘢出门口。好彩，一早就已经将待产包同入院嘅嘢准备好晒。       “哎呀，我上星期四洗完头，几日都无洗过啦。”突然谂起生仔前要洗头呢样嘢。        阿妈话：“仲洗乜鬼啊，由得佢啦。”       跟住，谂起要打个电话通知老公。之前仲幻想自己食炸糊，想去到医院先通知老公。不过，今次竟然係破羊水，破水后48小时内就必须要生出来，呢次包无假啦。于是，打电话俾老公。我谂佢呢个时候接到我电话，应该都知道有事发生噶啦。（仲幻想佢手机关机，然后打屋企嘈醒全家人）        “老公，我破水啊。依家执好嘢准备去医院啦”        “喔，咁我依家赶过来啦！”        跟住，就小心翼翼咁行落去。行嘅过程中水仲不断咁流出来。其实，一感觉到有水流出来就好紧张。水流得越多，BB就越危险。所以，喺车上面一直都问住到未。        其实，唔只我一个人紧张。阿妈都好紧张。挂号嘅时候因为我银包无钱，佢又无带银包，爸爸又去咗停车，我就拿张银行卡俾佢去碌，我写个密码俾佢，佢竟然读晒出来。而老公后来讲翻我知，佢喺屋企赶来医院嘅时候，开车都手震。        俾急诊嘅姑娘带咗入去一间房度检查，话我羊水可能有D浊，要等医生来检查下确认。等咗一阵，医生来啦。接受传说中可怕嘅阴检。当时嘅感觉就係：哇~好变态啊！唔知等阵生嘅时候係米更变态呢？        医生检查完就话，羊水有D浊，唔确定係一度定二度污染。跟住就同我讲，先上去待产房度先，不过随时有可能要剖腹。然后，就有人推我上去6楼嘅待产房。        原来，待产房係一格一格，你唔会睇到隔离床。因为之前仲幻想係好似普通嘅病房咁，可以同隔离床吹下水。推咗入去之后，又来一男医生，个样几猥琐噶，又来变态嘅阴检，检查完后又係讲翻同一句说话，就係随时做好剖腹嘅准备，不过今晚可以试下自己生先。我当时谂，我咁劲，应该可以自己生嘅。        后来，老公着到全副武装咁入来陪我。我仲差D唔认得佢，佢个造型后来仲俾出面嘅家属误以为係医生。奇搞笑~~跟住嘅呢个晚上，我就期待肚痛嘅来临。日盼夜盼嘅肚痛，终于有感觉啦！就好似M痛咁，仲可以忍受。俾咗60蚊嘅拉玛泽终于派上用场。的确，拉玛泽嘅呼吸方法係可以减少痛楚，不过只係初级阶段，如果太痛嘅话就真係唔得了。        成个晚上，就不断听到隔离有两个女叫到劏猪咁，老公仲赞我叻，一声都无叫过。我哋一直计时，大概5分钟痛一次，而且每次痛都好准时。当时，我仲好开心咁喺度谂，唔知开咗几指呢？如果医生一来检查就开咗7、8指咁就好啦。虽然惊，但係又好想医生快D来同我检查。等到凌晨4点，又惊又期待嘅阴检又来啦，助产士话我知开咗一指。其实有D失望，等咗几个钟头先一指。不过，我会继续努力嘅！！        之后，貌似痛嘅频率高咗，不过又好似越来越无规律。6点左右，医生换班。换班之后又有人来检查。点知呢次，个助产士检完话搵唔到宫颈口，唔知开咗几指，话要搵医生来。医生来咗后，死督烂督后，竟然话摸唔到BB嘅头仔，惊我胎位唔正，要去照个B超。之后，有个好似係阿head嘅助产士过来同我讲，我嘅羊水污染，如果我坚持顺产会令BB缺氧。我话，係医生叫我试噶。佢又话，你想顺产医生梗系顺从你嘅意思啦。        吓？乜个个讲D嘢都唔同噶？听到佢咁讲，我开始有D担心。虽然B超结果一切正常，胎心音一直都无问题。我同老公讲咗果个助产士嘅果翻说话，我哋就打算剖腹算啦，BB嘅安全最重要。但后来，果个医生又话可以尝试打催生素，讲到好安全咁。我哋就决定等多几个钟，如果无用，就下午剖腹。不过打之前，医生同助产士都叫我唔好食嘢。依家谂翻，其实佢哋对我信心都唔大，如果唔係都唔会叫我唔好食嘢啦。结果，一打咗催生素后，过咗5分钟后就立即有反应了。肚痛到难以形容...果一刻终于明白点解寻晚隔离床果两个女人叫得咁凄厉了，因为真係痛到眼泪都流出来。不过，当我流眼泪嘅果一刻，有D嘢又发生。老公好紧张咁叫医生来，原来胎心音突然下降得翻90几。医生护士一堆人过来。有人帮我转身，有人就停咗D针。后来再试咗一次，同样结果：我痛到眼泪标，胎心音降到100零几。当时，我同老公就下定决心：太危险了，剖腹算了。        其实，医生仲係话要try到下午2点睇下点。好彩，突然有嘅年纪比较大嘅助产士入来，同我哋讲佢係老公嘅街坊，叫我哋向医生提出剖腹。因为就算我一直试落去，最终都可能要转剖腹嘅，到时临急转可能麻药都赶唔彻落，而且就算可以生出来BB都有可能缺氧。听到佢呢翻说话后，我哋就下定决心无论医生讲咩都要剖腹。        当我哋向医生提出嘅时候，其实无一句话都无讲，就话同我哋安排时间。不过，我都係忍唔住喊。我觉得好唔抵，因为一直以来我日日都散步两个钟头，而且生之前几日仲同老公去咗越秀山行楼梯。结果到最后我都唔可以自己生。真係觉得好遗憾。        唔好以为剖腹打咗麻药就咩事都无啊，打麻药之前插尿管果嘢先罗命啊，简直同阴检一样咁变态。第一次入手术室，感觉好光啊！之前网上听咗好多话打麻药唔够的话，会感觉到俾人生劏咁噶。好彩，打完麻醉之后，医生会搵针吉下你问你痛唔痛。过咗可能10几分钟啦，就听到BB仔嘅喊声啦。头好似好晕，不过睇到係仔来。哈哈~~群众嘅眼光果然係雪亮嘅！！7斤2嘅小B仔！！医生会抱BB过来，俾个小鸡鸡你睇，问你係仔定女，然后我就晕下晕下咁话下仔。        因为麻药嘅作用，之后就只係感觉到有人推我出去，见到老公同阿妈，有人帮我过床.......然后，姑娘将BB抱过来放喺我身上。软绵绵嘅一团面粉咁，不过好可爱啊~~个头好似周围搵食咁啦！！        依家见到佢咁大只，真係有D难以想象佢之前喺我肚里面啊。生完之后只想讲：顺产的确好，对大人同小朋友都好，而且做妈妈嘅感觉会强烈过剖腹好多。但係某D医院一味追求顺产率，唔到危机关头都唔同你讲其实你嘅顺产条件唔好要转剖腹。好彩生嘅过程中遇到果位街坊。（之前一直都知道佢係做助产士噶啦，只係唔知道佢喺市妇婴）真係要多些佢~~因为之前我都係妈网度睇过一个帖话某医院要坚持顺产，结果BB缺氧导致脑瘫。BB健康始终係第一位。 [ 本帖最后由 cissey77 于 2009-8-20 14:02 编辑 ]

剖腹边有可能咁快上网写咁多耶啊，一定是老公代上网的。