cici1590
本身打算自己唔甘辛苦的，我联络户外组织同埋旅社，但系距地报俾我的价钱真系唔系我地依D师奶仔可以接受的。一于自己辛苦D自己再搞番组织咯。系两个月前我就已经联络西冲该沙滩负责人，俾订金预留左十二小木屋啦。
cici1590楼因为一共有十几个家庭参加，禅城区同埋桂城都有，所以我就设左两个上车点，一个系季华东建世纪广场KFC门口处，一个系南海广场对面的公交车站上车。大家都好准时甘到达上车点，我地如期顺利出发去西冲啦。
大巴好新，设施都好齐全下。何司机仲放电影俾我地睇添，大巴中段仲有屏幕可以供大家睇添。
佛山——广州——东莞——深圳——南澳——西冲，好快就睇到西冲的标牌啦。去到都中午啦，系时候要医下果肚仔啦，因为我地要早少少时间去海滩取房匙，所以我一早就联系一间餐厅订左五围围餐。于是我叫司机将大巴使去大鹏水头海鲜街。
系深圳西冲有两条好有名海鲜街，一条系水头海鲜街，一条系叫南澳海鲜街，模式都系一样的，一边系卖新鲜海鲜，而另一边系大排档，可以帮加工海鲜的。但想去的朋友一定留心，卖海鲜时一定要问清楚实际价钱，好多时，你要拣海鲜，对方讲都唔讲就即刻捞起放袋了。不过情形就比闸波好好多。只要你话唔要，距都会放番落水的。买左海鲜当然就要去加工啦。对面就系大排档啦，有好多食店拉客人入去加工的。一定要先问清楚加工费先好入去加工，因为间间食店加工费各有不同，距地一般讲得好含糊不清的，只想拉你入去店加工的。因为我地到水头海鲜街已经系十二点啦，所以就唔各自买海鲜加工啦，就直接食围餐啦。
我订的围餐系二百几蚊一围，八菜一汤，白饭任装，免菜位费。我仲每围台叫一支冰冻可乐添。老实讲，D菜色对得起果价钱啦，唔算太差又唔算话太好甘，只要自己要求唔高就得啦。因为我地要快D去到海边玩。甘大家好快就医饱左果肚啦。跟住往海滩方向行使啦。
去到海边小木屋区，我即刻快快手甘去办理住房登记。办好后，就分配房匙俾各位家庭。大家第一次见D小木屋都好特别。有D似个人木屋“别墅”甘。虽然细细间甘，但系五脏齐全。好快大家分别入房换衫准备去美丽西冲海玩啦。
因为之前台风过后，我地23号下午到海滩时，天气都系属于多云，无乜紫外线的。所以大家都好适服，唔会话因为阳光太晒搞到玩乐无心机。可惜我唔方便下水，搞到要同行朋友带果囡囡去冲浪。不过都好，可以有好多机会帮瀛瀛影相。
接近五点几时的西冲海滩,远处系情人岛，我地打算第二日坐大飞去上岛玩，顺便网鱼。海浪慢慢上潮，我地都分别番自己木屋仔准备好晚上的烧烤节目啦。
到左烧烤晚会啦！我地小木屋一出黎就系烧烤棚，好方便，系提前出发一日，我已经将烧烤人数交俾负责人啦，系西冲果度，每人烧烤费为25蚊一人，有埋食材提供啦，每八个人就有一个烧烤炉添。每人烧烤食材的（鸡比一只、猪扒两块、鸡翼一只、鸡肉肠一条，烧烤肠一条、什丸三粒、玉米一个、青椒一个、茄瓜一只、仲有韭菜添）系出发前我都买定两包鸡肉肠去的。今次经费可以悭左少少，我罗埋出黎叫同行朋友买左五箱饮料，四个哈蜜瓜，六个蜜柚。甘样大家可以食得丰富D啦。系依度好多谢帮我手买水果同埋饮料朋友们。仲有特别多谢桂城轩妈。距自己自驾车一齐黎同埋我地玩的。自己仲买左好多小朋友好钟意零食去添。真系唔话得啦。
小朋友手上果D就系我今次自己准备俾小朋友中秋节礼物。系用LED灯的中秋灯笼仔。有三个款色呀，分别系叮当、海绵宝宝、KITTY猫。系中秋前，天气一直唔好，我都系临近中秋先去买的，好多都无晒依种啦，放蜡烛就有好多种，但LED灯就好少啦，俾人订晒啦。我好辛苦先罗到番黎。大家小朋友玩得好开心！到最后，剩番好多玉米未烧呀，我地问左负责人罗左一个锅，将全部人果D玉米放晒入去煲熟晒。再将熟左玉米派俾其它人。
好宁静的西冲夜景。晚上海风吹过。好清爽感觉。晚上任何时候都可以走出去走走的。
[ 本帖最后由 cici1590 于 2010-9-28 08:41 编辑 ]
笑笑的MOTHER
5
gigiqi
天天关心
racyny
皓皓妈咪宝贝
晨妃
nn1126
开心女人
tiffany1688520
