我的仔仔出世啦。

怀孕以来就系人民路市妇幼做的产检。3月28号系YCQ，但呢一日仲系无动静，于是听医生讲再次去产检，做左胎监同二维彩超。医生睇完彩超结果话羊水量岩过标准线，叫我快D决定系米马上住院。出来同妈妈商量，因为前一晚成晚BB系肚度不安份左成晚，所以妈妈当即就话要听医生讲，住院。
由于我未有任何作动的现象，住的系七楼的待产病房，四人房，房费50蚊一日的。凭医生的住院通知，系一楼办好住院手续，买左张饭卡（100蚊，唔使压金）。之前听课的时候话生育保险的要交3500元的按金，但我办入院的时候只要我交左2000蚊，要碌自己的银行卡或者信用卡，唔可以碌医保卡的。医院伙食尚算可以，早、中、晚三餐系要提前有饭堂的人过来病房问你订唔订的，晚上九点左右仲会推架餐车出来，有宵夜，宵夜就唔使订，有粉、面、糖水等等。
入住第一日，有医生帮你做检查，类似妇科检查甘伸手入去子宫度的，感觉好唔舒服。当时医生就话我胎头已经好低啦，距都觉得好奇怪点解我仲未有作动，于是就话等第二日医生再来同我检查啦。所以，入住第一晚仲系好安静甘等待。
29号早上，一个男的医生（应该系主诊的）带住几个女的类似无甘高级的过来巡房，当距睇到我的B超报告时，同产检医生（我睇开的系任晓丽）讲的说话一样，羊水频临边缘，如果依家仲唔要BB出世，羊水会越来越少。同时，寻日同我检查的医生话可能我子宫壁厚，开口比较慢。于是主诊医生当即同旁边一个女医生讲，今日要尽快用药。我听完，问“系米催产药”？医生话“你自己有了解过吧？甘你一阵尽快冲个凉，就要同你用药架啦。”我问“用药几耐会见效架？”（因为我仲要等老公来陪我入产房架）医生话“好难讲，有人用左之后两个钟见效，有人用左24小时都未有反应”。
为左BB安全，于是我仲系乖乖甘冲凉，顺便带左个饭，快快手吃左，怕生的时候无力呀。
好累，休息一下再继续。。。

2011/04/06