我家小澄澄生产记
177717怀孕妈妈
Q.Y22号凌晨2点几，我发觉个肚有d肚痛，开头以为无咩事，就无理继续训！但系发觉越来越痛了，痛到有d唔正常，于是就即刻叫醒老公，然后好冷静咁先计算下痛噶时间同频率！发觉已经3分钟痛一次，咁我就起身睇下，发现见红了，睇来系要生得了！咁老公就穿衫叫醒我爸妈，一行人风风火火咁去医院！
大概3点左右去到医院，第一次尝试到指检了，真tam的痛啊！检查后就上待产房等待，老公就买待产包！系待产房系4人房，不过当时计埋我先得两个人！系待产房噶时间真系好难过，个肚越来越痛，后来已经发展到一痛就呕，唉，呕到7彩咁！我家婆后来都来咗了，一堆人就系待产房入面！
系待产房度做咗个胎监，个个都唔知咩鬼嘢医生来噶，又话BB好少胎动啊咁！又要我吸氧........大概到4点多d我就已经痛到顶唔顺了，老公去咗叫护士，护士来到就话做指检睇下开到几多指！！佢居然仲要拣人地宫缩噶时候做，痛死我啦........一检查就4指半啦，送产房！！
听到送产房心入面一阵欢喜！俾个护工推咗我上7楼产房，去到门口居然要我自己落地行入去......妈啊，无人性噶，仲要人哋行！唉，无办法之下唯有行咯！开头霖住可以家化产房，老公可以入去陪住我生噶，点知佢哋话满咗啦，就带咗我入大产房！
大产房有4张产床，第一张就已经生完了，好似生咗个仔，第二个努力中，第三个自然就系我呢个仲未生得噶人啦！当时就得我哋3个！上咗产床就又开始痛啦.......仲要痛到我想哭！好似有d嘢想冲出来冲出来咁！d护士就话你唔好用力啊，忍住啊！我话唔得啦，我想屙啦！跟手就问我要唔要打无痛，我霖咗下，就话打啦！依家霖翻起好彩当时话打嗻，如果唔系都唔知点捱过来！系等麻醉噶时候又宫缩，简直就系要命了！个麻醉师终于来到啦！！欢欣.........打麻醉噶痛都已经唔算系痛了，因为宫缩更加痛！打完麻醉之后宫缩依然系痛，我就心霖，啞称噶，又话唔痛......后来我又系度叫姑娘，姑娘话无咁快噶，等阵啦，好快就唔痛噶啦！
唉，我都唔知过咗几耐了，居然真系唔痛了噢！！而隔离床就生咗个女仔！我简直就舒服到已经想训了，因为折腾咗成晚都未休息过！我霖我应该小睡咗一阵，因为我都无咩意识咁了！见到隔离两张床都生完了，我就霖，我几时生呢？？呢度咁大，得自己一个，突然觉得好无助！又无带手机噢，想打个电话出去都唔得！唉........
望住个钟6点几，7点几，d时间系咁过，到d姑娘交班了，我都未有反应！呢个时候姑娘就问我吃咩早餐啊？叫你老公去买！我话无所谓！过咗好耐，个姑娘问我，你老公去咗边买早餐噶？咁耐噶？我话，唔知噢！后来有个啊姨就送早餐入来了，系两盒拉肠！哈哈，啦啦声吃翻盒先！吃咗一大半，感觉有d吃唔落了，惊等阵呕翻出来就无吃！然后又继续训系度努力等待！
到8点几差唔多9点噶时候，个助产士就话可以生噶啦，宫缩噶时候用力啦！晕地，咩叫可以生啊？点生啊？咩都无教了！呢个时候宫缩开始痛翻了，我心霖唔系麻药过咗啊嘛？？超惶恐！！宫缩来了，唔理咁多啦，用力就用力啦！用力........个助产士话唔啱啊，唔系咁用力啊！再来多次啦！试咗几次佢都话唔啱，话已经见到BB噶头发噶啦，你用力啦！大佬，我又未生过点知点用力噢.......唉，开始觉得越来越慌张了！个助产士又教我个pp向下用力，好啦，我试下啦！佢居然话用得啱啦！继续！就咁折腾咗我成个钟都未有动静，佢地就开始铺无菌噶用具，应该准备侧切了！系佢地唔知做紧咩噶时候，我突然想呕，一呕一用力，就将澄澄生咗出来了！个助产士话，哇，呕个下力咁犀利噶！唉，我心霖早知我早d呕啦，唔使搞咁耐！
助产士就将BB举起问系仔仔定女女，我睇咗好耐先话系女女！因为我一直以为系个仔，所以有d唔敢相信！其实我一直都想生个女噶，哈哈，终于恨到了！开心！一个就帮BB清理，一个就帮我缝针！由于麻药加咗量，所以全程系无感觉噶！唔痛！全部嘢搞好晒之后就系产房等咗2个钟就可以推翻病房啦！
见到女女噶第一眼觉得不可相信啊，好得意！d手指似到我10足10，好满足啊！不过有d失望就系，俾人推出产房噶时候，老公第一眼见到我居然咩都无讲！唉，生之前仲一直系度期待老公到时会同我讲咩！但佢居然咩都无讲！激死我了！当见到爸爸妈妈噶时候我已经想哭啦！不过我忍住！唔知点解就有仲冲动想哭！
其实生都唔算辛苦，辛苦噶系当麻药过咗个伤口痛到根本就训唔着噶时候！我当晚就痛到翻来覆去，根本就无训过！又唔俾我吃止痛药！最后凭住意志克服咗啦！系医院3日就出院翻屋企！好彩女女都好乖，吃饱就训！已经无咩望啦，希望女女健健康康，开开心心成长就好了！
2011/12/31
张晓聪
Q.Y楼
5
妈咪最爱既小宝
