有惊无险，93考试顺利归来

琴日9.15去考93，我地原本系下午5点先入场验证嘅，3点系教练档口出发，去到白云大道嘅时候教练接到考场嘅电话话提前左考试时间，过时先差唔多4点，教练就好开心同我地讲话去到就可以考试了唔洗等，早D考光线都比较好，早考就早走。去到考场停好车，教练就急忙带我地上山去93考场.去到教练就打算话去报到，点知话未到我地要等，教练话被距地厄左。没办法，只能系度等。等待嘅时间系漫长嘅，终于到了教练报到，报到后没几耐就见屏幕待考区度有我嘅个名。原本就紧张了，而且我系我地考场第一个去考就更加紧张。等到个名去左准备考试去度就去报到验证，我地考场3个都系考旧车9号车。验证完就落楼梯去发车区等考试车，考试车翻来后教练上去掉转头，叫我上车试一下离合高低调车镜，跟住就带我到待考区，即系准备斜坡起步嘅位置。去到待考区前面仲有车未发车，教练落车，跟住同我讲考变样就睇雨刮边点。见到个雨刮，我仲惊啦，同我地教练嘅车雨刮唔一样，教练车嘅系网上凸，考试车系向下凹嘅，睇点好难睇，而且不废车个靠背调唔到，调节嘅位系坏噶。由于教练接到电话话提前考试，到考场停车场后就即刻赶去山上，导致垫背嘅枕都唔记得带上来，唔够高又调唔到个靠背，雨刮对点又难睇点，几样因素加埋搞到我真系手屯脚阵，又惊又紧张，睇到教练都为我担心，拍我肩头叫我深呼吸几次，冷静D。到我发车了，教练帮我开到斜坡脚，就叫我上车调座位，调镜。接到考试讯号后，开始考试了。因为我地系B斜坡，所以颇为比较长，可以慢慢追线。由于紧张过度，可能追线追唔好，又怕离合控唔好死火，上坡时离线比较宽自己都没注意，听到教练系后面大声喊向右追线，即刻往右打方向继续龟速前进。睇到差唔多到定点位置时好紧张，怕定错点啊，睇住左镜过左条线小小嘅时候就即刻踩刹车，停完就起步向前。见到7号通道绿灯就开入去，斜坡转入7号通道个弯位比较急，自己开嘅时候好惊控唔好撞去左边。入左通道后系例牌嘅侧泊位，又系追线，追线位比较短，求其追到唔压线，2号杆系右后窗过左小小就停了，因为前面有距离限制怕压线。紧张嘅心情自考试起就未定落来，手忙脚乱几乎连步骤都错左，倒车——对2号杆——右打死倒车——对4号杆回正——睇左后轮压线———左打死倒车入库回正——出库。出库后我嘅车速一样系龟速，教练话慢慢来错左补救嘅机会都比较大。慢慢向下一个项目前进，望下前方系乜科目，睇到系直角转弯，个心定小小，起码唔洗睇个雨刮来对点先啦，考场嘅车嘅雨刮对点对我来讲实在太高难度了。一样系追线，车头过左前面条线小小就往右打死前行，视线边直之后回正方向前行。出来就见到教练系出口度等，叫我将车往斜坡上开。停车后教练问我合格未，我话唔知啊没语音提示嘅，教练睇下副驾驶个屏幕，真系激到飙烟，居然显示通道连接中，状态仲未进入考试。教练问附近指挥嘅考员甘系乜意思，过个人居然话叫重考多次，翻去出发点度问，听到甘，我真系仲惊到鼻哥都没肉啦，甘惊青先考完出来，居然话叫考多次，激到教练都爆粗。拿拿林开车翻去出发点，再问出发点嘅指挥员究竟成绩点，果个工作员用对讲机问监控过度我考试点样，可能监控度复左个指挥员，但距又太忙就叫教练自己上去等考试过个大厅问，因为教练要接下一个学员就叫我自己去问成绩。上去大厅度问果个四眼仔，个四眼仔好唔耐烦好恶死甘话，你要问几多次先得啊，都话左及格了，质检员讲左你听你都唔信。苍天可鉴，如果个质检员讲左我听我合格嘅话我仲洗鬼跑上来问你，申请比你闹咩。唔系你考试你梗系唔紧张啦，讲的甘轻松。唉，虽然系甘比距系度侄，但听到话合格，都系礼貌甘同距讲声多谢，虽然距没素质但我唔会同距一样甘没素质。
系外面等其他学员嘅时候，教练车住考完个学员经过见到就大声问成绩点，我话过左了。睇来教练都同我一样甘担心，呵呵。
琴日我地考场3个人考，2男一女，有一个男嘅考单边桥衰左，另一个男嘅同我一样考7号通道，顺利通过了。
流水账讲左一大堆，93终于都顺利同过了，教练话大概下星期就可以考长途了，顺利嘅话10月就可以取证了。希望剩下嘅科目都听听话话甘顺顺利利通过吧，同时都祝考93嘅人顺利通过，顺利毕业。

2012/09/16