咁大个女，做咗人阿妈了都好少出去旅游，谂住个女三岁，係时候应该带她出去见下世面，近近哋，就香港啦！个女对啲大型嘅卡通人物唔係好感兴趣，仲有啲惊添，所以迪士尼就不在选择之列。海洋公园盛名在外，但係身边啲同事朋友去过都力劝唔好去，话又细又唔好玩，而且老公换唔到班，唔可以星期五出发玩足三日，得星期六日两日时间，最终，我哋选择咗香港嘅离岛----南丫岛。

南丫岛之旅真係“精彩至极”，打咗双引号都知道係咩嘢意思啦~~不过唔系好差，只係好搞笑，充满咗惊喜，绝对係人生不能忘记嘅一次旅行经历，想去南丫岛嘅MM们，咁就千其唔好错过呢篇游记啦！

去之前上妈网查过其他妈妈写嘅攻略，我呢篇唔係攻略，係游记，皆因几乎完全冇成功经验可言，哈哈！睇过啲功率，大概知道点去，係边度搭船咁，酒店冇得网上预订，咁就谂住去到南丫岛见步行步啦！

10号老公因为落夜班，搞来搞去成九点半先制係屋企出发，我哋係坐广九直通车去嘅，囡囡唔坐得巴士，和谐号惊周六日多人通关会等好耐，个女又未坐过火车，所以选择直通车。其实淘宝上有好多都有订票订酒店嘅服务，我冇选择係因为南丫岛嘅酒店係网上预订唔到，地铁一日通嗰啲对于我哋今次嘅行程意义不大，因为多数都係搭船、搭渡轮，问过同事话直通车嘅飞都几充裕，去到车站再买都OK。经过今次，我觉得火车飞都系预订好啲，唔使白白坐係度等。

当日去到广州东站已经差唔多十点，十点三十八分班次嘅车飞已经全部买晒，我哋唯有等十二点十二分嘅车，我见啲票咁紧张，就叫老公买埋回程嘅飞，11号晚上六点三十半分打道回府，事实证明呢个决定係非常明智嘅。火车站啲工作人员态度依然同十几年前一样，讲嘢一係有气无力，一係就大声夹恶，WELL，接受到嘅~~入站秩序几好，火车上嘅环境同卫生都唔错，女女好开心，全程两个小时唧唧喳喳兴奋到咩嘢咁，查过天气预报，话香港个两日都系陈雨多云，但係天公作美，两日嘅天气都非常好，将海洋嘅美色都尽收眼底。两点十五分到达香港红磡，半个小时就办完通关手续。係红磡就可以搭乘东铁线到尖东，係东铁地铁站有比大型行李通过嘅闸口，嘟八达通就可以通过，推BB车就唔使惊麻烦啦！

係尖东步行至尖沙咀好快，顺住隧道嘅指示行（荃湾线）大约十分钟就到，可以搭地铁过海到中环，亦都可以出地铁站搭乘天星小轮过中环。係中环嘅4号码头就可以搭船过南丫岛啦！

10号天气晴朗万里无云，但係好大风，我哋上船嘅上层坐，谂住比女女睇睇大海。个女第一次搭船，大风大浪吹到只船左摇右摆，冇话她咁细个人仔，就连船上啲大人都有几个趴住係椅PAN度晕船浪。女女就趴係老公心口，一味话：点解咁晕嘅？哈哈

大约十五分钟之后就到南丫岛，就来埋岸就见到山顶嘅大风车，今次冇去到。南丫岛係个细细嘅渔村，房屋最高都唔超过三层，冇机动车，岛上嘅交通工具就係单车。我哋係榕树湾落，一落船就见到好多度假屋，周一至周五300-450港纸一晚就有交易，周六日就升到600-700港纸，其实啲度假屋就係住宅改建成而成嘅，环境干净，但係唔好奢望豪华，寸土黄金嘅香港几百蚊千其唔好有太好嘅幻想。我之前查过嘅攻略话洪圣爷泳滩有酒店同度假屋，就大安主意谂住去到泳滩先租啦，原来错误就係呢度开始，我哋去到南丫岛已经将近四点半，我同老公推住个急急脚赶去洪圣爷，连途径阿婆豆腐花都冇吃到，途中有个婆婆卖姜糖同钵子糕，姜糖唔係我哋平时吃开嗰啲，係一层好似班戟皮包住啲椰丝同姜丝嘅饼，唔係好甜，好好好好吃，下次去要再吃多次，钵子糕好大件，老公居然两啖嚼晒。

大概行十五分钟就到泳滩，推住车子唔使揽住个女已经悭咗好多力，但你都咪话唔攰，如果带小朋友去，唔怕麻烦嘅一定要带车子，可以推人亦都可以推行李，一物几用。去到泳滩悲剧发生了，係成个洪圣爷泳滩得一间酒店，ONLY ONE，走去问价钱，标双加张子母床嘅要1380港纸，普通标双1280港纸，包早餐，其他房源已经订满咗，间酒店係就係几靓嘅，非常之有情调，好ROMATIC FEEL，但係千千声一听就打晒退堂鼓。来香港之前老公问过，喺香港叫得酒店嘅，环境好少少嘅，冇一千蚊都唔使谂。咁唯有问问隔离卖小食嘅阿姨有冇度假屋出租，她叫我哋上楼问问士多老细，老细话有。。。。。。不过好残下，你哋介唔介意先，700港纸一晚，不议价。我哋跟他去睇过间屋，残就未至于，但係就真係好简陋，间屋好耐冇通风，一阵霉味，张床放咗喺角落头，好细张，1.5都冇，空调就装喺床头，认真劲。700蚊便咗咁多，係咁嘅质素嘎啦，成交。训完一晚发现，有时钱呢家嘢真係唔悭得。部电视得个衬，黑白加雪花，唔睇好过睇，有煤气煲水，冲凉房干净，係电热水器。放低行李就马上去海滩玩，落日余晖，仲唔係好冻，女女第一次见海，有啲紧张，唔敢掂水，就坐喺沙滩度玩沙，洪圣爷海滩嘅沙入边有好多贝壳碎，小朋友最好唔好赤脚行，要带拖鞋去。听住海声，吹住海风，真係好写意。

玩佐大概半个钟到就收嘢，因为太阳差唔多落山，冇咗太阳，即时冻咗好多。返房冲凉洗衫搞掂所有嘢差唔多七点了，谂住出来吃嘢，OH MY GOD，大大个海滩，连间吃嘢嘅地方都冇，有两间烧烤档，带住个女烧乜鬼嘢烤啊，睇下酒店嘅餐牌，一个套餐268港纸，望住通往榕树湾嘅山路，顶硬上，路边虽然有路灯，但係好暗，老公开住手机听歌壮壮胆，我部手机就係喺去吃饭嘅途中唔见嘅，好惨哪~~~~~~

途中见到岛上嘅居民啲屋冇加装咩嘢围栏或者係防盗网，治安应该唔错，大部分都有养狗，山路度见到几个狗厕所，见到一间大屋，前院有滑滑梯同车仔，有三个男仔坐埋一齐喺嗰厅度睇电视，哇，开心到~对住个海，大大间屋，心境都开阔啲。差唔多到榕树湾见到间车仔面档就停低了，好似叫蔡记，叫咗碗车仔面比女女吃，自己吃煎饺，老公吃牛腩面，讲真，唔好吃，个人口味问题，埋单盛惠96港纸。

吃完见到有群人往洪圣爷方向行，我哋就跟住一齐行，一大帮大人同小朋友，我同老公仲话咁夜先过来嘅，住喺边啊？原来他哋係上山CAMPING。返到去已经将近八点半，见到好多后生喺度烧烤，我哋冇娱乐活动，连电视都冇得睇，就大被盖过头训教，本来每晚个女都中意拿我部手机出来玩游戏嘅，就係嗰晚冇，所以我哋都冇发觉部手机跌咗，再次伤心~~~

间房啲蚊闻到有人气就出来活动，唔开冷气都唔得，部冷气一着，哇，大声到好似开咗部发动机咁，轰隆轰隆，女女同老公好快训着啊，平时返老爷奶奶度我都认床，更何况係呢张床，好痛苦，训到十一点几，三个钟好似十个钟咁，女女唔舒服翻来翻去，我哋两只肥嘢夹住她又难为她嘅，搬她入最埋边训，熄咗部空调，实在太吵，而且喺头顶吹风落来，唔係好舒服，情愿比蚊咬都唔想冻亲，点知熄咗空调冇蚊不但止，间房其实唔係想象中咁闷热，好舒服，凉阵阵，终于安安乐乐咁训着咗。

第二天起身就发觉手机唔见咗，多得开朗嘅老公，呢啲小问题无影响我哋游玩嘅心情，女女死都唔肯吃早餐，话要吃昨天喺榕树湾买嘅鸡蛋仔，好好吃咁话，其它嘢都唔吃，喺海边玩咗半个钟到就出发榕树湾买嘢吃同搭船返出去了。回程嘅船我哋咗下层，舒服好多无咁晕，女女明显生猛咗好多，左问又问，仲一直讲话唔晕喔，点解唔晕嘅，临到埋岸风浪大个阵，即刻收声，趴喺老豆身上话而家好晕，哈哈哈哈~落船之后就搭天星小轮过尖沙咀，行咗下星光大道，去佐敦、旺角行咗下，我哋今次来无购物打算，沿路见到有啱嘅嘢就买啲咁咯，跟住就返归啦~

今次行程係就係乌龙啲，但係充满乐趣，下次再来，就预订车票，早点过来，喺榕树湾租屋住，到洪圣爷泳滩玩，天黑之前再返榕树湾吃嘢行街，问女女下次仲来唔来啊？她话搭船好晕，唔来。我话如果表哥或者係有小朋友想同你一起来咁点算啊？她老老积积话咁咪一起来咯，晕就晕咯