好味桑拿鱼

      同朋友煲电话粥，讲讲下就讲到食了，佢话金沙洲有个农庄D桑拿鱼好好食喔，又话点香、点滑，比佢讲到个胃蠢蠢欲动，正所谓拣日不如撞日，抽起条为食根就要佢带路去了。时值落班时候，好在都无塞车，从滨江东过到金沙洲都唔使一个钟，期间在海珠路接埋个朋友。朋友凭印象只记得农庄个地点系中海金沙湾楼盘嘅后边，靠三骏市场附近。好在大路一条，唔使费咩周折就揾到了。
      我哋六个人点咗条六斤几重嘅无骨鱼，一碟肠粉、一打饺子、一碟萝卜糕、一个竹肠，菜就一份番薯叶、一份丝瓜，部分骨腩就滚粥。
      所谓【桑拿鱼】，制作原理同焗桑拿一样，就系通过水蒸气将鱼蒸熟，时间要调教准，唔系可能会过火就无咁好食了。
不过放心，店家已经将每样食品嘅制作时间写出嚟贴在煤气炉个开关旁边了。
   在等鱼出嚟嘅时间，我地先食其他嘢，值得赞一个嘅系个肠粉，经理话，D肠粉系自己磨粉蒸出嚟，比其他酒楼食市嘅唔一样，好滑伽。果然D肠粉真系好正，滑到好似自己会捐入喉咙咁

，在广州好耐无食过咁正嘅肠粉了。
鱼搞好后【腌制过】挪出嚟，按照提示，等水滚起就将鱼放落锅，几分钟后就食得了，个个都迫不及待咁挪起筷子就夹了。一食，果然系好鲜甜、嫩滑喔......
最后埋单362大元，感觉小贵。其实鱼唔贵，二十几文一斤。其他嘢就贵咗D。总体觉得都几好，有时间带家人嚟食下。

【从广州方向自驾车去行金沙洲大桥，穿过隧道一直行到尽头，就系中海金沙湾个楼盘转右，第一个红绿灯转左，在右手边见到卜蜂莲花嘅，再一直行，第一个路口转左几十米就到了】