本来系打算17号一早开车去珠海过关，之前系妈网收集左好多妈妈分享自驾过关的资料，在此先多谢一下分享自驾经验的妈妈。

16号早上我一早去做产检（26周+），产检返离已经系下午啦，跟住同LG去饮左个下午茶，相量左一下17号的行程，后来LG突然话不如一阵返屋企就出发，因为第一次开车去珠海又唔系好识路，又怕我一早起身出发会好辛苦，所以决定早一日过定去珠海视察下过关的环境，因为之前系妈网话明珠路有一段系封闭施工，兜好耐先出返离，仲有停车的问题，都系早一D过珠海住一晚，第日早D过关。以下讲一下16号下午的行程：

8月16日下午3点左右系屋企出发，导航最快路程到珠海情侣路，行广珠西线—深罗高速—广澳高速—港湾大道—情侣路，途经两个收费站，路费一共78元，广珠西线到深罗高速有个收费站出左再左转入返收费站，行4公里右转入返深罗高速。（比较坑爹）到珠海情侣路大约系5点多D，跟住就直奔妈妈们讲的侨光路118号海安园停车比较平的地方，经过的时候海安园已经挂住个车位已满的牌，该小区真系离关口好近，步行大约10分钟就到关口（两个红绿灯的距离）。小区有一个门口对面就系另外的MM讲华润万家，都可以停车，环境视察完后就决定系附近稳间酒店住落离，因为都系怕第二日早上会停唔到车，都系以可以停车的酒店为主，问左系关口附近的几间酒店，一D系话无车位，一D就系话有车位，不过退房车就要走，比钱都唔可以停（晕），系关口兜左一圈，睇到系关口附近停车都几贵，15元/小时，200元/日。最后系迎宾南路稳左间酒店住左落离，最开心的事终于都解决左，就系车你钟意几时开走就几时开走，仲要免费，果间酒店系离关口4个红绿灯的距离，行路到关口大约20分钟左右。（P.S16号下午已经系3号风球，晚上好似10点几就挂左8号风球）

8月17日，早上6点45分退房，我同LG慢步行去关口，关口唔算多人，系广场开始有铁马围左两圈加一条直路排队入大厅，入到大厅我同LG行14号帮扶通道，只有几个老人家过关，出关都系行帮扶通道，到澳门系7点20分非常快。但系意外就出现啦，我同LG身上加埋只有9蚊葡币，林住一出关就去兑换店兑D葡币，先吃早餐跟住坐的士去大马路开始一日购物旅程，点知关闸附近好多铺头都无开门，连兑换店都无开，我地都唔知发生咩事，身上只有9蚊，记得MM们话有BUS可以坐到去大马路，跟住就去附近的BUS站等车，等左好耐都无车果时已经8点几，系去车站的时候见到有几间银行都系写住9点开门，甘就林住系附近行下等到9点就去银行兑钱，点知系BUS站附近见到有个啊叔好大声甘讲今日无BUS啦，唔使等啦！晕，真系一头雾水，究竟发生咩事啊，难道系遇上摆工？？？？后来到9点多D银行都系无开，但系已经开始见到D发财车往关闸方向开，同LG相量后我地步行返去关闸坐发财车去大马路，返到关闸见到好多人系度等发财车，但系全部发财车都唔上客，后来好多人问葡京的司机几时开车，司机话9点半，要等8号风球除左先开工，真系晕啊，原来距地8号风球全部唔上班，怪唔得知兑换店，银行，BUS全都唔开。9点半新濠天地的车最早开出，陆续其他地方的发财车都开出，唯有新旧葡京的车唔开，后来司机话10点先开，哎，唯有一个字等，我地排得比较前应该第二台车就可以上啦，点知越离越多人就系车旁边企系度，前面的人又唔话距地，司机又唔出声，一话开车，结果后面的人全部都冲左上去，我地等D人上晒车我地先慢慢再上车。

到左大马路之后就同LG去左睇距的野，刷卡买完距的野之后就林住去附近的银行兑钱，点知依然都未开，后来又去左买送比人的野，买完后再去银行，依然都系未开，跟见到对面的中国银行开左马上入去用500蚊人仔兑左621.7葡币，终于都可以去吃野啦。果日我地大约3点就回程过关啦，因为LG怕我太累所以买完野就走啦，无咩点行街，我地都系有目的甘去买野。本来想去埋氹仔，LG话今日行得太长时间唔同意，等我生完先再去。

8月17日下午回程，过关后我地系珠海吃左个下午茶就开车返归啦，直接导航林住试下行国道，点知真系导左我地去明珠路，行左小小我地见唔对路马上开返出离，无跟导航，见路就开，出返离之后我地重新导航，选返行高速，点知仲系点我地行返果度，我地无理导航，有路照行，我地向珠海机场方向行，系公路度行左好耐果度无见到话返广州的提示，导航一路叫我地掉头，后来见到路监的人我问下往广州的高速点行，距话直行就得啦可以返广州，我地听距讲一路直行，行左20几公里终于见到好似系原京珠东线，现广珠西线，向广州，深圳，佛山方向，系离度入左收费站后就到芳村的收费站先出，我同LG林今次可能要100元左右的路费，结果出收费站有D意外，竟然全程69元，比之前去仲要平，又快！我地系东升服务区休息左半个钟，4点半系迎宾南路走，返到芳村坑口大约5点45左右，以上系本人的自驾经历。