我叫胡轼7月7日，怀孕刚好39周的既我终于生左我个仔仔轼轼了，为左纪念依件事，同时都想比距第日睇翻妈妈生距系点既，决定写落黎，顺便同各位美妈分享一下。
废话唔多，直接进入主题
我既预产期系7月14号，进入7月份，我已经经常感觉到宫缩，有时痛有时唔痛，最痛果次系行唔倒果只（不过同正式生果次相比简直系湿湿碎）。终于，系7月6号果日凌晨3点，我感觉倒下面湿湿地同时伴随住肚痛（好似M痛感），马上叫醒我老公开灯睇下系米穿羊水，羊水就无穿就系小小见红。我换左条裤两个人继续淡定训觉，自己心琳应该无甘快挂，可能系虚火，未必甘快生。但系我发觉个肚好似越来越痛甘，我见唔系路就自己开始计算肚痛既间隔，时长时短，短既4、5分钟就痛一次，长既十几分钟痛一次。就系感一直等到早上6点左右，我同老公讲可能真系生得啦，已经开始无规律既宫缩。我老公就马上同我家婆讲，我家婆叫我马上去医院仲话好快就生得，全屋气氛顿时紧张晒。但系我知道自己肯定无生得甘顺利，就慢慢黎，淡淡定甘。而且当时开始落雨，我想等雨停左再去医院，但系家婆坚决要马上去，我唯有服从冒雨去医院。到左准备出门口时雨特然好大，我真系唔想甘快出门口，我记得我担住把遮都全身湿晒，仲要肚痛行几步就要透下好鬼辛苦。我老公去左摞车，但系都要行出去条巷先摞倒，平时好简单既程序系果个风雨交加既清晨变得复杂而痛苦。
7点左右，终于到左海珠区妇幼。我地直奔4楼（之前怀孕因胎太细水小仲有妊娠糖尿住过院，对于入院流程十分熟悉），我系个护照站度大声同护士讲生得喇生得喇，十分紧张。点知个护士淡淡定甘耻笑左我一下，叫我填左资料先。终于都顺利入院喇，住左去最多人既8人间。做左一次传说很痛既指检，居然同我讲连宫颈都未软，有排都未生得。我极之失望，不过那个可怕的指检唔系好痛，系我接受范围内（我系一个好怕痛既人）。指检完后，果阵已经9点钟啦，居然个肚突然唔点痛啦。隔离床仲同我讲距上星期已经肚痛见红，但系入左院就唔痛一直都未生得。我心琳，我唔会又系感挂。我见自己无咩野，就叫家婆翻去先同埋叫我老公去翻工。我自己就顺便训下补眠翻，直到下午1点几，都一直无咩反应，我自己就周围行来行去。行下行下，个肚终于又有翻宫缩，越行就越痛，我坚持行左3个钟左右，顶唔顺，翻床休息一下，吃D野再准备行过。点知一翻到床休息，又变到无咩宫缩，我心琳唔通真系要逼我一直行？休息左一阵我就又继续行，行上行落。老公又未到，自己一个人周围行，痛既时候就自己扶住栏杆狂忍，面部表情全部扭曲，痛完又继续行。直到7点左右，吃完晚饭又继续行，足足行左一日。终于见到有成果，个肚宫缩貌似开始有规律。行下行下，到左9点左右，个肚已经非常非常痛，依个时候仲未有人黎陪我。我之前上网睇话宫缩痛得犀利可以泡个热水浴会减轻痛楚。我就去冲凉房用热水一直淋个身同个肚。就系感一直淋左成两个钟，手皮都皱巴巴的了（依招真系好有用，起码会减轻3分1痛楚）。冲凉出黎后，老公终于黎左啦，距陪我继续行左一阵就翻房训。
噩梦正式开始啦，12点钟左右，我貌似已经宫缩时间好短啦，平均7分钟痛一次，痛既时间仲越黎越长，由20几秒到痛成接近一分钟。就系感我一直忍，忍到2点几，开始真系顶唔顺，开始做出D非正常行为：咬老公、扯床单、抓紧随手物。又过左1个钟，我开始出现呕出，呕左两次后，我开始产生放弃顺产既念头，就同老公讲问下护士可唔可以马上剖腹，我已经顶唔顺，已经到左极限。老公马上去问，点知距话深夜除非有紧急状况，否则唔会批准剖腹，要等听日医生巡房时候再同医生要求剖腹。听日！我都已经痛死左啦！不过距话无得剖，我唯有继续忍。随后又出现左几次呕吐，将所有吃过既食物都呕晒出黎，最后呕到无野呕，呕黄疸水，连黄疸水都呕过不下3次，果晚一共呕左9次。问医生点解会呕，距话有D人痛得犀利就会感，正常噶！到左5点左右，我叫我老公再次要求剖腹，果阵时已经系5分钟痛一次，一次痛接近一分钟。我果阵已经出现想死既念头，去厕所果阵同我老公讲话想马上系个窗度跳落去解决算数，距当时唔鼓励我竟然仲话：感你去跳咯！我果阵真系嬲到想杀左距，竟然讲D感既说话！我会记一世的！老公再次要求剖腹既结果都系一样，依个时候护士同我做左一次指检，答案系宫口开始软化啦。我听左之后极极极失望，我已经痛左26个钟，竟然同我讲只系宫口软化。距依句话坚决左我要剖腹既信心，我马上同老公讲，听日无论点，只要医生一翻到医院，马上要求剖腹，仲要系马上剖！老公见我痛得甘辛苦，就同意我剖腹。
6点几时，护士见我呕得甘犀利，惊我无力生，开左两瓶葡萄糖比我吊补充翻D能量。好唔容易，终于都挨到8点医生巡房时间，8点半左右，我期待既一刻终于到喇！我一见到我既主诊医生，第一句话就系“医生，我要剖腹，唔洗讲其他啦，尽快开刀”。医生同家婆仲有护士都极力建议我顺产，话我条件好（胎位落，胎细容易生），我老公原本支持我剖腹既，点知到左依个时候距又变左支持顺产，全世界一齐轰炸我！我都继续好坚持话要剖腹。我既主诊医生系李医生（全名唔记得了），距话先帮我做个指检再决定，结果系开左一指！我马上讲，痛左近30个钟先开左一指，等到10指要几时啊，我继续强烈要求剖腹！李医生话距会帮我顺产，同我讲先帮我打支镇定针缓解下痛楚，等到开到4指就可以上无痛，到时就会舒服好多。我依然继续坚持话要剖腹，全部亲戚叫我顺产，我都唔听。距地又继续同我讲顺产既好处，剖腹既坏处，又同我讲我地（医生）会尽力协助你，帮你减轻痛楚。经过左半个钟既要求无效后，我无奈地答应尝试一下顺产。我仲同医生讲：我试一阵噶咋，都仲系开得慢既话我马上要剖。距就话先去待产室看看情况再算。就系感，我被轮椅推进了待产室。待产室系3楼，即系睇儿科既地方，当时早上9点几正系最多人既时候。因为待产室有人，唔可以叫我老公陪，只有一个护士陪我。我入去待产室时仲系门口当住好多人面前哭着大叫我唔入去，我想剖腹！
入左待产室，距地马上帮我打左支镇定剂，同我讲，打左会无甘痛，你趁机训下觉啦。打左之后真系舒服左DD，我超级眼训，好快就训着左了。过左一阵间（不准带手机，睇唔倒时间），我又被那恐怖的痛楚痛醒。而且痛得越来越密，越来越长。我开始系待产室大叫好痛，并同护士要求剖腹。点知我既大声呼叫直接被在闲聊既护士们无视，仲话我人地都无大叫，叫我唔好嘈留翻D力生仲好。我感到极度无助，唯有默默继续忍受痛苦。过左一阵，我叫负责照顾我既护士喂D粥比我吃再饮左小小红牛（都系自己准备好的）。吃完野后，护士帮我做左个指检，话已经开到二指。我心琳，有希望啦！忍痛都变得有动力。系待产室期间我一直都系用果个咩呼吸法，发觉都几有效，起码可以分散注意力，觉得时间过得快小小。就系感，自己一直默默地吸气呼气吸气呼气，唔知过左几耐，觉得痛既感觉又加强左，已经顶唔顺啦，叫护士帮手做指检。终于听到我最想听既野啦，开到3指可以上无痛！依个时候我问左一下几点，距地话一点。我仲话甘快就到深夜一点啦？距地笑住话我系米痛到傻左，依家先下午一点。过左一阵，麻醉师终于黎左啦。虽然只系一阵，但系都已经觉得好漫长。距系我背部整来整去，终于都打左。药力大概半个钟左右见效。我感觉到痛楚越来越小，药力完全起效时我已经觉得唔系好痛了，唔知系米痛左甘耐已经痛惯晒。依个时候又做左一次指检，话可以入产房了！系果个时候，无咩野比听倒依句说话更加兴奋了。心琳：甘快就可以入去生！好快就可以同BB见面啦！
入左产房后，自己行上手术床，个助产士一直自己系度准备D野，叫我自己用力先。讲真，果阵我已经咩力都无啦，但系都用最后既力黎生。自己用左几分钟力之后，助产士终于都行左过黎帮我生啦。距一过黎就话我只系逼左D屎出黎，BB一D都未出黎（D屎出黎我咩感觉都无，可能系打左麻醉既关系）。助产士叫我继续用力，头果几次用力我都系继续逼屎出黎，助产士仲话点解我会甘多屎逼倒出黎（我事后琳翻，我生之前都无人叫我柯干净D屎）。终于逼完屎啦，开始用力将BB逼出黎，经过左大概5分钟既恶斗后，bb都只系见到个头，依个时候我见到助产士手上摞住一块好多血既布，我先知我已经被侧剪了。依个时候，助产士话唔知边度卡住左，要打电话叫医生落黎睇下。我听到后吓到我飞起，心琳唔会搞左甘耐先黎转剖腹挂，我伤不起的！医生落左黎，帮手伸手入去搞翻正之后叫我继续用力，但系我真系唔够力，BB个头一直冲唔倒出黎。助产士话再出唔倒黎BB就可能会缺氧噶啦，我依个时候开始惊，死甘用力，真系出奶既力都出埋。都系唔得，个头次次都系差D先出倒。这时，助产士话：再唔得就要再剪下啦。我听到后唔想比距再剪多下，再用埋最后果D力，终于，终于我系多重恐吓下BB终于出左黎啦。14:是15分，我望住岩岩摞出黎既BB，由心入面笑左出黎，一路望一路笑。助产士仲帮我地做左一次肌肤接触将BB放左系我胸前，当时觉得所有既痛苦都值得，自己比自己感动到喊。
随后BB就放左系我隔离，我就被缝针。缝针我无感觉唔痛楚，大概十几分钟就缝好喇。BB被送左出去，我就要观察2个钟先可以出去，生完之后唔知边度黎既精神，可能系兴奋吧，一直训唔着。因为心急想见BB，2个钟变得超耐，我全身又旭唔倒。我生左无几耐，又推左一个孕妇入黎生，系同我同房既一位年轻妈妈。我仲系距生紧果阵一直鼓励距叫距加油。依家琳起都觉得搞笑！
顺产真系好好，我麻醉过左后马上就可以落床啦。除左剪既部分小小痛之外，都无咩不适。生完后，李医生黎巡房，我十分感激距坚持叫我顺产，猛讲多谢！
最后，附上轼轼近照一张
轼轼既成长都会记录系http://www.gzmama.com/thread-3126142-1-1.html依张帖入面，求祝福求献花！多谢多谢！！
ellato
我叫胡轼楼
猫猫rain
布帛菽粟
珍爱小猪
asfdtyu
